Një qytetare serbe e Kosovës me inicialet J.V. është shoqëruar sot (24.11.2024) në stacion policor për “incizim të paligjshëm”, te postblloku në Bistricë të Leposaviqit.
Këtë e ka konfirmuar Shefi i Operativës Rajonale për Mitrovicë të Veriut, Petrit Fejza.
“[E dyshuara] Është shoqëruar deri në stacion për shkak se ka bërë disa incizime. Është ngritur kundërvajtje kundër saj për incizim të paligjshëm. Te pika e Bistricës janë shenjat që ndalojnë incizimin dhe fotografimin, por ajo i ka bërë” – tha ai për Kallxo.
Fejza shtoi se ajo ka vazhduar me incizime edhe pas tërheqjes së vërejtjes nga policia, prandaj është dërguar në stacion për t’u intervistuar. Pas intervistimit, siç njofton Fejza, e dyshuara është liruar në procedurë të rregullt.
