Ndryshe nga presidentja e Kosovës, Vjosa Osmani, kryeministri i Kosovës, Albin Kurti, gjatë një takimi me anëtarin e Presidencës së Bosnjë-Hercegovinës, Zhelko Komshiç, ka qenë i shoqëruar edhe nga ambasadori i Kosovës në Kroaci, Martin Berishaj, i intervistuar së fundmi nga Prokuroria Speciale si i dyshuar për “shpëlarje të parave”, “shmangia nga tatimi” dhe “mosraportim ose raportim i rremë i të ardhurave, i dhuratave, i dobisë tjetër materiale ose i detyrimeve financiare”.
Ndryshe Osmani, në një intervistë për emisionin “Kallxo Përnime”, kishte konfirmuar se nuk e ka ftuar ambasadorin Berishaj gjatë vizitës së fundit që kishte zhvilluar në Kroaci.
“Nuk kam pasur komunikim me të, nuk e kam takuar. Nuk ka qenë me mua në vizitën e fundit (në Kroaci). Sepse kështu kam vendosur”, ishte shprehur Osmani.
Ajo gjatë intervistës kishte vlerësuar se ambasadori Berishaj duhet të largohet nga përfaqësimi i vendit derisa drejtësia të japë fjalën e fundit.
Rasti i Martin Berishaj
Mediat sllovene raportuan për një skandal të madh financiar ku ishte i përfshirë edhe ambasadori Berishaj.
Në artikullin e TV Planet thuhej se Martin Berishaj kishte kompani në Mal të Zi me emrin MB Consulting dhe paguhej si konsulent nga kompania e energjisë elektrike GEN-I dega në Beograd.
Më vonë, do pranohej nga vetë Berishaj se është e vërtetë që ka kompani me këtë emër dhe gjithashtu është e vërtetë se u pagua nga GEN-I dega në Beograd.
Berishaj veç marrjes së parave dhe kompanisë në Mal të Zi, ai po dyshohet se një pjesë të parave të marra në Beograd nga GEN-I i ka sjellur edhe në Kosovë.
Ato para të Berishajt dyshohet se financuan fushatat e Lëvizjes Vetëvendosje dhe Listës Guxo.
Ekziston po ashtu edhe një kallëzim penal për Berishajn i cili dyshohet se ka bërë evazion fiskal dhe nuk ka paguar taksa.
Përkundër këtij skandali me përmasa rajonale, Berishaj ka mbetur i paprekur në pozitën e tij.
