Altn Krasniqi, djali i Jakup Krasniqit, ka bërë me dije se Partisë Demokratike të Kosovës i është bashkuar pas konsultimeve me babin e tij, i cili gjende në paraburgim në Hagë.
Ai ka treguar se vendimi i tij për të kandiduar për deputet në radhët e listës së PDK-së ka ndodhur me miratimin e familjes dhe miqve që e kanë mbështetur dhe i kanë qëndruar pranë gjatë këtyre katër viteve.
Në profilin e tij në “Facebook”, ai ka shkruar se Kosova mundet më mirë.
“Vendimi për të pranuar kandidimin si deputet nga radhët e Partisë Demokratike të Kosovës erdhi pas konsultimeve të kujdesshme dhe me miratimin e plotë të babait, familjes dhe miqve tanë që na kanë mbështetur dhe qëndruar pranë gjatë këtyre katër viteve. Na priftë e mbara bashkërisht! #mamirë”, ka shkruar Krasniqi.
Ndër të tjera, ai ka përmendur faktin e babi i tij ka qenë nder themeluesit e PDK-së.
“Sot, jam kthyer në partinë që babai im ishte një nga themeluesit e saj ku dhe ka dhënë një kontribut të madh. Si anëtar i Partisë Demokratike të Kosovës, ai ka mbajtur pozita të rëndësishme shtetërore dhe politike, si ministër, deputet dhe kryetar i Kuvendit duke u përpjekur gjithmonë të japë më të mirën e tij. Si ai, edhe unë përpiqem të jap kontributin tim në rrethanat e reja të Kosovës, duke besuar se Partia Demokratike ka qenë dhe mbetet një forcë kyçe në proceset e shtetndërtimit. Kam zgjedhur këtë subjekt sepse synimi i tij ka qenë dhe është gjithmonë të sjellë ndryshime pozitive, një mision që sot sigurisht është më i lehtë se sfidat e mëdha të së kaluarës”, ka shkruar Krasniqi.
