Deputetja e Partisë Demokratike të Kosovës, Ganimete Musliu ka kritikuar kryeministrin e Kosovës, Albin Kurti, për qasjen ndaj Prokurorisë dhe refuzimin që t’i përgjigjet ftesës së Prokurorisë Speciale për intervistim si dëshmitar.
Musliu ka thënë se veprimi i Kurtit është imazh i keq për qytetarët dhe sjellja e tij është e frikshme.
“Qasja e Albin Kurtit ndaj çdo gjëje në këtë vend, Kushtetutës, gjykatave, prokurorisë, mediave, opozitës dhe çdo gjë që është e frikshme. Thjesht, ne jemi duke rrëshqitur në diktaturë… Veprimet e Kurtit janë të frikshme. Një njeri i cili më fjalën më të shkurtë kisha me thënë ka lujt, njëri i cili tenton të shkatërrojë çdo gjë që është ndërtuar në këtë vend, themelet e këtij shtetit duhet të japë llogari nëse jo para gjykatave të jap para popullit”, ka thënë Musliu në Tëvë1.
Kurti, ndonëse ka shprehur gatishmërinë të përgjigjen në ftesën e Prokurorisë, ka kërkuar që ata të shkojnë në zyrën e tij.
Por, ai ka hedhur akuza ndaj Prokurorisë, që siç ka thënë dëshirojnë të bëjnë skenare me pamjen duke hyrë në prokurori.
Por, akuzuat e tij i ka mohuar Kryeprokurori i Prokurorisë Speciale, Blerim Isufaj. Ai ka thënë se ligji vlen për të gjithë, përfshirë edhe zyrtarët shtetëror.
