Kandidati i Partisë Demokratike të Kosovës për kryeministër, Bedri Hamza ka njoftuar se është takuar me ambasadorin William Walker.
Hamza përmes një shkrimi në rrjetin social Facebook, ka thënë se Walker është heroi i lirisë së vendit.
Tutje, ai ka shtuar se ftoi ambasadorin Walker që të jetë “observues i drejtpërdrejtë i festivalit të demokracisë në këto zgjedhje”.
“Një kafe me ambasadorin William Walker, heroin e lirisë sonë, zëri i të cilit na dha shpresë dhe i hapi rrugë intervenimit të NATO-s. I kujtuam çastet vendimtare të historisë së Kosovës, biseduam për aleancën me SHBA-në dhe për mënyrat sesi qeveria ime do ta forcojë aleancën me Perëndimin. Ambasadorin Walker e ftova që të jetë observues i drejtpërdrejtë i festivalit tonë të demokracisë në këto zgjedhje nacionale, të cilat doemos do ta bëjnë Kosovën ma të mirë” – ka shkruar Hamza.
