Kandidati për deputet nga radhët e Aleancës për Ardhmërinë e Kosovës (AAK), Daut Haradinaj, ka thënë se siguria e Kosovës vjen përmes NATO-s, përmes saj vjen edhe siguria ekonomike e zhvillimore. Kështu ka thënë Daut Haradinaj në tubimin madhështor në Fushë Kosovë.
“Fushë Kosova është epiqendër e shqiptarëve, të gjithë adresë të parë e kanë këtë qytet e Lugina e ka shtëpi të dytë. Ky vend duhet të dal nga terri 4 vjeçar i trajtimit vetëm si rrugë për të kaluar, aq afër qeverisë dhe aq larg projekteve kapitale”, ka thënë Daut Haradinaj. Haradinaj ka shtuar se siguria e Kosovës vjen përmes anëtarësimit në NATO.
“Siguria e Kosovës vjen përmes NATO-s, përmes saj vjen edhe siguria ekonomike e zhvillimore. Ne si koalicion për Kosovën Fituese, kemi plan konkret dhe të realizueshëm për këtë etapë që po hyn Kosova. Bashkë do e këndellim këtë vend, bashkë do e integrojmë, bashkë do zhvillojmë. Fushë Kosovë, jam krenar me ju”, është shprehur Daut Haradinaj.
