Komisioni Qendror i Zgjedhjeve (KQZ) ka njoftuar se vendosja e kamerave vëzhduese në hapësirat e vendvotimit për zgjedhjet parlamentare të 9 shkurtit në Kosovë do të bëhet me qëllim të garantimit të sigurisë së materialeve zgjedhore.
Zëdhënësi për media i Komisionit Qendror të Zgjedhjeve (KQZ), Valmir Elezi, në lidhje me këtë çështje ka bërë të ditur se kamerat do të vendosen në skajin tjetër të vendit ku do të jetë e pranishme kabina e votimit në qendrat e votimit në Kosovë.
“Vendosja e kamerave vëzhguese në hapësirat brenda vendvotimit bëhet me qëllim të garantimit të sigurisë së materialeve zgjedhore dhe ruajtjes së integritetit të procesit të votimit dhe numërimit në vendvotim. Vendosja e kamerave në vendvotime do të bëhet duke siguruar plotësisht fshehtësinë e votës, pasi ato do të vendosen në skajin tjetër të vendit ku do të jetë kabina e votimit dhe në asnjë rrethanë nuk do të mund të regjistrojë shënjimin e preferencës së votuesit”, tha Elezi.
Sa i përket ruajtjes së regjistrimeve të kamerave, zëdhënësi i KQZ-së thotë se këto regjistrime do të jenë me kohë të përkoshme deri tek shkatërrimi i materialit zgjedhor.
“Ruajtja e regjistrimeve të kamerave do të jetë e përkohshme deri në shkatërrimin e materialit zgjedhor, me përjashtim të atyre nga vendvotimet ku evidentohen parregullësi me qëllim që t’iu ofrohen institucioneve ligjzbatuese”, thekson Elezi për rtv21.tv
Ndërkaq në qasjen e videoregjistrimeve sipas Elezit do të ketë qasje vetëm me vendime dhe kërkesa të institucioneve ligjzbatuese.
“Në ditën e zgjedhjeve, KQZ nuk do t’i monitorojë këto kamera, pra regjistrimi nga ana e tyre do të bëhet në mënyrë pasive dhe se qasja në videoregjistrime mund të sigurohet vetëm me vendim apo kërkesë të institucioneve ligjzbatuese”, potencon ai.
