Albin Kurti mbrëmë u bëri ftesë simpatizantëve të tij në orë të vona që ta dalin ta festojnë rezultatin e zgjedhjeve parlamentare të 9 shkurtit. Mirëpo, është në pikëpyetje nëse ai do të arrijë ta formojë qeverinë e re. Ai para disa vitesh shprehej ashpër kur partitë tjera vepronin njëjtë.
Ai thoshte se gara zgjedhore nuk duhej të shihej si garë automobilistike. Po ashtu, rikujtonte se logjika për të parin në garë është monarkiste, shkruan Insajderi.
“Ata mendojnë garën zgjedhore si një garë mobilistike. Kush dul i pari, me e marrë kupën. Po republika nuk është garë automobilistike. Zgjedhjet demokratike në republikë është kush e formon shumicën e tërësisë. Tërësia është çështja, e shumica është vendimmarrja. Pra, jo kush është i pari në garë, por kush e formon shumicën”, deklaronte ai.
“Ka pa fund raste në shtete të tjera anembanë botës ku partia e parë s’arrin me e kriju shumicën. Edhe kot është e para, se republika e tillë është republikë parlamentare e demokratike. Kjo logjika i pari në garë është monarkiste: I pari është mbreti, e kur vdes ai vjen pasardhësi”, thoshte ndër të tjera Kurti.
Kurti duket se ka harruar çfarë ka thënë më herët, ku në deklarimet e mbrëmshme të tij tingëllonte sikurse t’i futej ndonjë gare automobilistike. Ai pati sulm për mediat e i quajti opozitën “hajvana”. Krejt kjo pasi mori vesh se kishte dalë i pari në zgjedhjet parlamentare.
Sidoqoftë, rezultati që Kurti ka marrë nuk garanton formimin e qeverisë./Insajderi
