Komuna e Podujevës e ka shpërblyer me tender të negociuar kompaninë ‘Elite Premium Bau’, tender ky që i ka kushtuar komunës së Bulliqit, 42 mijë euro. Por, kompania “Elite Premium Bau”, nuk ka një të kaluar të gjatë biznesore. Vetëm para nëntë muajve, pronari e kishte regjistruar në ARBK.
Komuna e Podujevës, që udhëhiqet nga Shpejtim Bulliqi, ka nënshkruar tender për “Intervenime urgjente”.
Kontrata është dhënë me procedurë të negociuar, derisa afati për përfundimin e punimeve është 30 ditë.
Me këtë tender është shpërblyer kompania OE “Elite Premium Bau” në Podujevë, me vlerë të ofertës 41 mijë e 999 euro”, thuhet në vendim.
Intervenimet për debllokimin e kanalizimit do të kryhen në qytet, Merdare, Lladofc, te rrethi, në rrugën “Nuhi Shatri”, Batllavë te boshnjakët, rrugën “Ali Ajeti” tek qeshmja, te QKMF, fshatin Shtedim, Dumnicë, Llugë, Shtedim, Obranq, Dobratin, Bradash, Llapashticë e në lagje tjera.
Në disa lokacione do të bëhet edhe furnizimi dhe montimi i kapakave në puseta.
Vlera e përgjithshme e kontratës është 41 mijë e 999 euro.
Kompania fituese është “Elite Premium Bau SH.P.K”, e cila është në pronësinë e Endrit Ymerit nga Podujeva.
Ymeri këtë biznes nuk ka shumë kohë që e ka regjistruar.
Sipas Agjencisë së Regjistrimit të Bizneseve, figuron se kompania “Elite Premium Bau Sh.P.K”, është regjistruar me 16 maj të 2024’tës. Që i bie nëntë muaj.
Kontratat njëburimore janë ngritur si problem për diskutim nga organizatat e shoqërisë civile që e monitorojnë prokurimin publik.
Kontratat e tilla janë formë e kritikuar si e dyshimtë e korruptive.
Ani pse, kontratat njëburimore mund të lidhen sipas Ligjit të Prokurimit Publik por duhet të plotësohen disa kushte.
Ndër këto kushte sipas nenit 35 janë: Në raste emergjente kur nuk ka kohë për të ndjekur procedurat e zakonshme ose kur ekzistojnë arsye të veçanta teknike ose artistike që justifikojnë përzgjedhjen e një ofruesi të veçantë.
“Nëse, për arsye objektive dhe të detyrueshme teknike ose artistike, kontrata duhet ti ipet një operatori të caktuar ekonomik; Nëse, për arsye të mbrojtjes së të drejtave të pronës intelektuale apo industriale apo të drejtave ekskluzive, kontrata mund t’i ipet vetëm një operatori të caktuar ekonomik;
Nëse, për aq sa është shumë e nevojshme për arsye të emergjencave ekstreme që janë shkaktuar nga ngjarje objektivisht të verifikueshme të cilat nuk kanë pasur mundësi të parashikohen me arsye nga autoriteti përkatës kontraktues, autoriteti i tillë kontraktues nuk mund ta japë kohën e kërkuar për ushtrimin e cilësdo procedurë tjetër që parashtrohet në këtë ligj.”, thotë ligji. /Insajderi.org/
