Ish-kryetari i Gjykatës Kushtetuese, Enver Hasani, ka thënë se Kosova rrezikon të izolohet nëse Qeveria e re nuk e dërgon statutin e Asociacionit në Gjykatën Kushtetuese, brenda një afati të shkurtër.
Hasani beson se Bashkimi Evropian dhe Shtetet e Bashkuara të Amerikës nuk do të tolerojnë më vonesa apo lojëra fjalësh në dialog, duke shtuar se se situata mund të rëndohet sa më shumë që zvarritet ky hap.
“Nëse Qeveria e re që formohet nuk e çon statutin për një afat të shkurtë për në Gjykatë, ne izolohemi…BE-ja sot ka halle të tjera… Nuk besoj që ka vullnet në Evropë dhe në SHBA që me toleru një lojë fjalësh në dialog. Sa më shumë të zvarritet, aq më e rëndë do të bëhet”, ka deklaruar Hasani në KTV.
Hasani ka thënë se marrëveshja e arritur në Ohër, përfshirë formimin e Asociacionit, është një detyrim ndërkombëtar për Kosovën dhe se duhet të zbatohet.
“Kur merr detyrime ndërkombëtare, duhet t’i zbatosh…”, ka shtuar ai.
Hasani ka lënë të hapur mundësinë që marrëveshjes t’i shtohen elemente të reja, por ka theksuar se detyrimet e marra nga kryeministri Albin Kurti në Ohër janë tashmë të pandryshueshme dhe të paevitueshme.
