Agjencia për Informim dhe Privatësi ka shqiptuar një gjobë prej 8 mijë eurosh për Kolegjin Universum në Ferizaj, për shkelje të rregullave të përgjithshme lidhur me përdorimin e kamerave të sigurisë. Sipas vendimit të lëshuar më 23 dhjetor 2024, inspektimi ka zbuluar se në ambientet e kolegjit, konkretisht në sallat e ligjëratave dhe tualetet, përkatësisht pranë lavamanëve, ishin vendosur kamera vëzhgimi, në kundërshtim me Ligjin për Mbrojtjen e të Dhënave Personale. Për këtë rast, Kolegji ka dhënë një sqarim.
Si pasojë, institucioni është urdhëruar të heqë sistemin e mbikëqyrjes nga këto hapësira dhe të sigurojë që përdorimi i kamerave të përputhet me dispozitat ligjore të aplikueshme.
“Gjoba e shqiptuar duhet të paguhet brenda 30 ditëve nga hyrja në fuqi e këtij vendimi, ndërsa mosrespektimi i afateve do të sjellë masa të mëtejshme”, thuhet në vendimin e AIP, shkruan Insajderi.
Arsyetimi i AIP-it mbi gjobën
Agjencia ka dhënë arsyetimin për gjobën e shqiptuar ndaj Kolegjit Universum në Ferizaj për shkak të vendosjes së kamerave të vëzhgimit në hapësira të ndaluara, si sallat e ligjëratave dhe tualetet.
Në vendim thuhet se, Agjencia mori një ankesë më 29.11.2024, ku pretendohej se në shkollën e mesme të ulët në Ferizaj (në kuadër të Kolegjit Universum) kishte kamera në sallat e ligjërimit dhe në tualete.
Më pas, u krye një inspektim zyrtar më 10.12.2024, ku u konfirmua se ishin instaluar 25 kamera, nga të cilat 14 ishin funksionale.
Sipas tyre, kamerat ishin vendosur pa njoftim dhe në hapësira ku mbrojtja e privatësisë është e garantuar me ligj.
“Ligji përcakton që vendosja e kamerave duhet të bëhet vetëm për siguri dhe në përputhje me dispozitat ligjore”.
Pas këtyre gjetjeve, AIP shqiptoi një gjobë prej 8,000 eurosh, duke e cilësuar shkeljen si serioze dhe të dëmshme për privatësinë e nxënësve dhe stafit.
Në analizën e saj, Agjencia referohet Kushtetutës së Kosovës dhe Konventës Evropiane për të Drejtat e Njeriut, të cilat garantojnë privatësinë e individëve. Gjithashtu, përmenden precedentë nga Gjykata Evropiane e të Drejtave të Njeriut që kanë përcaktuar se vëzhgimi në klasa dhe tualete është shkelje e privatësisë
Rrjedhimisht, Kolegji është urdhëruar të largojë menjëherë kamerat nga sallat dhe tualetet, dhe të respektojë dispozitat ligjore për vëzhgimin me kamera.
Çka thonë nga Kolegji Universum?
Lidhur me rastin, Gazeta Insajderi ka kërkuar një përgjigje edhe nga përfaqësues të Kolegjit Universum duke sqaruar se çështja lidhet me shkollën e mesme në Ferizaj dhe jo me vetë kolegjin.
Kolegji Universum ka bërë të ditur se menjëherë pas vendimit ka paguar gjobën në përputhje me afatet ligjore dhe se kamerat në sallat e mësimit janë hequr.
“Dëshirojmë të theksojmë se gjoba që është shqiptuar është lidhur me shkollën tonë të mesme (gjimnazin) në Ferizaj, dhe jo me institucionin tonë të arsimit të lartë “Kolegji Universum”. Pas vendimit, shkolla ka vepruar menjëherë dhe ka paguar gjobën në përputhje me afatet ligjore të përcaktuara. Pas kësaj, dëshirojmë t’ju njoftojmë se nuk kemi kamera të instaluara në sallat e mësimit,” thuhet në përgjigjen tyre.
Ata shtuan se nuk kishin qenë i informuar më parë për ndalimin e kamerave në klasat mësimore dhe se nuk kishte marrë më herët vizita inspektuese apo paralajmërime për këtë çështje.
“Ne nuk ishim të informuar më parë se përdorimi i kamerave në klasat mësimore ishte i ndaluar, dhe as nuk kemi pasur më herët vizita inspektuese apo paralajmërime. Konsiderojmë se kjo ka qenë një keqkuptim nga ana jonë lidhur me rregullimin ligjor për mbrojtjen e privatësisë dhe të dhënave personale”.
Sidoqoftë, Agjencia për Informim dhe Privatësi ka konsideruar se gjoba e shqiptuar ka qenë e nevojshme për të parandaluar shkelje të tjera të privatësisë në të ardhmen.
