Në Evropë, prej nga Kosova do të obligohet të importojë energji elektrike nëse riparimi i kapaciteteve të prodhimit në KEK do të marrë kohë, çmimi i energjisë elektrike aktualisht janë të larta.
Një megavat-orë në tregun global kushton mbi 115 euro për megavat-orë të mërkurën, tregojnë çmimet në bursën ndërkombëtare.
Në bursën hungareze, prej nga rëndom Kosova importon energji elektrike, sipas çmimeve të prezantuara të mërkurën, një megavat-orë i energjisë elektrike kushton 117,93 euro.
Çmimi në bursat ndërkombëtare i një megavat-orë të energjisë elektrike vazhdon të jetë i lartë krahasuar me çmimet para krizës energjetike, e cila goditi Evropën në vitin 2020. Kriza në tregun global asokohe ishte shkaktuar kryesisht si pasojë e pandemisë.
Ndërkaq, në Kroaci çmimi i një megavat-orë energji elektrike të mërkurën peshon 113 euro, bazuar në të dhënat e uebfaqes së specializuar të çmimeve në tregun global të energjisë euenergy.live.
Këto çmime, për Kosovën do të kenë kosto edhe më të lartë kur i shtohet edhe kostoja e bartjes së energjisë elektrike.
Rëndimi i situatës elektroenergjetike në Kosovë arriti kulmin të mërkurën në mbrëmje me rënien nga funksioni të Njësisë B1 të termocentralit Kosova B.
Burime të Paparacit afër Korporatës Energjetike të Kosovës kanë thënë se vetëm Njësia A4 është në punë aktualisht.
KEK është duke prodhuar 114 megavat në orë, ndërsa kërkesa në tregun e brendshëm ka arritur në mbi 1000 megavat në orë.
Nga pesë njësi gjeneruese të energjisë elektrike të KEK-ut, aktualisht vetëm një prej tyre është ne funksion, kanë thënë burimet.
Njësia A3 e ka ndalur punën të martën në mbrëmje, kanë thënë burimet. Ndërkaq, Njësia B2 ndodhet në remont.
Anash 114 megavatëve në orë nga KEK, Kosova është duke prodhuar edhe 68 megavat të tjera në orë nga burimet e ripërtëritshme të energjisë, ka mësuar Paparaci.
Por, gjendja mbetet e rënduar.
Këtë e ka konfirmuar edhe KEK, në një njoftim për media të enjten.
Korporata tha se Njësia B2 e Termocentralit Kosova B ka rënë të mërkurën në mëngjes.
Sipas njoftimit të tyre, puna atje është ndaluar për shkak të rrjedhjeve të konsiderueshme të ujit.
KEK-u ka njoftuar të mërkurën se procesi i sanimit të gypave të dëmtuar do të zgjasë deri në 48 orë, derisa tha se ka arritur të sigurojë rreth 5000 megavat energji elektrike nga burime të jashtme “që përfaqëson 90% të kapacitetit të planifikuar të prodhimit të njësisë B2”.
