Deputetja e LDK-së, Hykmete Bajrami, ka reaguar ashpër ndaj vendimit të Zyra e Rregullatorit të Energjisë (ZRRE) për ngritjen e çmimit të energjisë elektrike, që pritet të hyjë në fuqi nesër.
Ajo e ka cilësuar këtë vendim si një goditje të rëndë për standardin e jetës, fuqinë blerëse të qytetarëve dhe bizneset në Kosovë.
Në një postim në Facebook, Bajrami ka theksuar se në katër vitet e fundit çmimi i energjisë ka dyfishuar, dhe tani pritet edhe një ngritje tjetër.
Ajo ka kërkuar që ZRRE të pezullojë çdo vendim deri në formimin e Kuvendit të Kosovës, në mënyrë që bordi i ZRRE-së të paraqesë dhe të justifikojë vendimin e tij para deputetëve.
Reagimi i plotë:
JO, VENDIMIT TË ZRRE-së PËR NGRITJE TË ÇMIMIT TË ENERGJISË
Nesër pritet që ZRRE të marrë vendimin përfundimtar lidhur me tarifat e energjisë, andaj përtej koalicioneve, numrave e formulave qeverisëse, kjo është një çështje që prek çdo qytetar e çdo familje dhe godet drejtpërdrejt ekonominë e vendit tonë.
Lidhja Demokratike e Kosovës është kundër çfarëdo vendimi për ngritje të çmimit të enegjisë elektrike.
Ky nuk është thjesht një vendim teknik i një institucioni “të pavarur”. Ky vendim është goditje e radhës për standardin e jetës, për fuqinë blerëse të qytetarëve dhe për bizneset në Kosovë.
Në këto katër vite qeverisje, energjisë i është dyfishuar çmimi, tani po pritet edhe ngritja e radhës.
ZRRE duhet të pezullojë çdo vendim deri në konstituimin e Kuvendit, në mënyrë që bordi t’i raportoj dhe të justifikoj propozimin e tyre para atyre që i zgjedhin – deputetëve të Kuvendit të Republikës së Kosovës.
📌Si ka mundësi që tri herë rriten tarifat e energjisë, derisa energjia nga KEK-u i shitet KESCO-s për vetëm 29.6 euro/MËh?
📌Si arsyetohet vendimi i ZRRE-së, kur KESCO dhe KEDS nuk i publikojnë pasqyrat e tyre financiare?
📌Si ka mundësi që edhe ministrja ekonomisë e pranon se nuk di nëse këto kompani e kanë përmbushur planin e investimeve?
Në këto pyetje dhe shumë të tjera duhet të përgjigjet bordi i ZRRE-së, në Kuvendin e Republimës së Kosovës, para se të marrë çfarëdo vendimi për një ngritje tjetër të çmimit të energjisë.
Ne kemi përgjegjësi ndaj qytetarëve të këtij vendi. Ne jetojmë këtu dhe e dimë se kostoja e jetës është dyfishuar, se ligji për pagë minimale nuk po zbatohet, se çmimet e produkteve bazë po rriten çdo ditë. Duke pasë parsysh të gjitha këto edhe një ngritje e tarifave të energjisë do ta vështirësonte edhe më shumë jetën e qytetarëve, ndërsa bizneset do të detyrohen të rrisin edhe më shumë çmimet e produkteve dhe shërbimeve.
