Korporata Energjetike e Kosovës ka anuluar kontratën e planifikuar me kompaninë “Exfis” për furnizim me lëndë djegëse për kaldajë – mazut (Fuel Oil 1.0%), në mes të dyshimeve për shkelje dhe falsifikim dokumentesh në procesin e ofertimit.
Negociatat për këtë kontratë ishin zhvilluar përmes një procedure të jashtëzakonshme me negocim, pas dështimit për më shumë se një vit të tenderit të rregullt, i cili vazhdon të jetë i bllokuar në Organin Shqyrtues të Prokurimit (OSHP).
Më 19 mars 2025, KEK kishte njoftuar se kishte mbajtur negociata me kompaninë “Exfis” për furnizimin me mazut, mirëpo pak ditë më vonë aktiviteti i prokurimit u anulua.
Sipas KEK-ut, arsyeja zyrtare për anulimin ishte mungesa e rikonfirmimit të mjeteve financiare, sipas rregullave të Rregullores për Prokurimin Publik.
Megjithatë, Demokracia.com ka raportuar se vendimi për tërheqjen nga kontrata ka ardhur në kohën kur janë ngritur dyshime serioze për një nënshkrim të mundshëm të falsifikuar në dokumentet e ofertimit nga kompania “Exfis”.
Këto dyshime janë evidentuar nga OSHP, por nuk janë dërguar ende për hetim penal.
Pavarësisht kësaj, KEK kishte injoruar rekomandimet e OSHP-së dhe kishte vazhduar përpara me procedurat, derisa vendimi për anulim u mor në momentin e fundit.
OSHP tashmë ka rekomanduar që Komisioni Rregullator i Prokurimit të marrë masa disiplinore, duke përfshirë tërheqjen e licencës së shefit të prokurimit të KEK-ut dhe vendosjen e një gjobe prej 10 mijë eurosh.
