Rrjeti i OJQ-ve AVONET ka zhvilluar një hulumtim të detajuar në lidhje me një aktivitet të prokurimit të zhvilluar nga Komuna e Gjilanit, në cilësinë e Autoritetit Kontraktues, i cili aktivitet është titulluar “Blerja e shërbimeve shëndetësore profesionale shëndetësore”. Gjatë këtij hulumtimi, AVONET ka identifikuar dyshime serioze për përdorim të dokumenteve të rreme nga operatori ekonomik “KosovaMed Health Care SHPK”.
Sipas të dhënave zyrtare të siguruara nga AVONET, operatori në fjalë ka paraqitur referenca të lëshuara nga komunat Klinë, Junik dhe Skenderaj, të cilat përmbajnë informacione të pavërteta në lidhje me vlerën e kontratave të realizuara. Në një rast konkret, referenca e lëshuar nga Komuna e Klinës pohon se janë realizuar shërbime në vlerë prej 550,000€, ndërsa të dhënat zyrtare tregojnë se deri në momentin e lëshimit të asaj reference kontrata e realizuar ka qenë vetëm në vlerë prej 300,487.25€.
AVONET vlerëson se këto referenca janë përdorur me qëllim, dashje dhe vetëdije të plotë për të plotësuar kriterin e kërkuar në dosjen e tenderit të aktivitetit të prokurimit “Blerja e shërbimeve shëndetësore profesionale shëndetësore”. Ky veprim, sipas AVONET, përbën mashtrim dhe cenon parimin e konkurrencës së drejtë në prokurimin publik.
Në këtë drejtim, Autoriteti Kontraktues – Komuna e Gjilanit, pas përfundimit të këtij aktiviteti të prokurimit, më datë 24.09.2024, ka nënshkruar kontratën në vlerë totale prej 449,683.20 euro me operatorin ekonomik “KosovaMed Health Care SHPK”.
AVONET shpreh shqetësim të thellë ndaj anëtarëve të Komisionit Vlerësues të ofertave dhe Zyrtarit Përgjegjës të Prokurimit në Komunën e Gjilanit, të cilët kanë dështuar të ushtrojnë detyrën e tyre me profesionalizëm dhe përgjegjësi të plotë ligjore. Sipas organizatës, kjo është manifestuar me ofrimin e kundërligjshëm të përfitimit të dobisë pasurore për një operator ekonomik, përmes ekzekutimit të kontratës së aktivitetit të prokurimit të zhvilluar nga Komuna e Gjilanit.
Komisioni kishte për obligim të verifikonte saktësinë e dokumenteve të ofertuara dhe të sigurohej që operatorët ekonomikë nuk kishin paraqitur informacione të pavërteta për të përfituar kontratën. Kjo mospërfillje dhe neglizhencë, sipas AVONET, përbën jo vetëm shkelje të rregullave të përcaktuara në legjislacionin primar dhe sekondar në fushën e prokurimit publik, por ngrit edhe dyshime serioze për bashkëpërfshirje apo tolerim të qëllimshëm të mashtrimit në prokurim publik.
Në këtë drejtim, AVONET i është drejtuar me kërkesë për inicim të hetimeve Prokurorisë Themelore në Gjilan, nën dyshimin se nga të gjithë personat e përfshirë në këtë rast janë kryer këto vepra penale: Mashtrimi me prokurim publik (neni 415 i KPRK-së), Deklarim i rremë nën betim (neni 383 i KPRK-së), dhe Keqpërdorim i pozitës apo autoritetit zyrtar (neni 414 i KPRK-së). AVONET shpreh besim të plotë në punën profesionale të Prokurorisë Themelore në Gjilan dhe pret një hetim të plotë në përputhje me autorizimet ligjore për këtë rast.
Gjithashtu, AVONET njofton publikun se më datë 14.04.2025 i është drejtuar me kërkesë për marrjen e masave Kryetarit të Komunës së Gjilanit, Alban Hysenit, ashtu siç është i obliguar me normat e neneve 56 dhe 99 të Ligjit Nr. 04/L-042 për Prokurimin Publik të Republikës së Kosovës. Megjithatë, deri më tani nuk ka ndonjë informacion zyrtar nëse i njëjti ka zbatuar apo jo detyrimin e tij ligjor.
Për këtë arsye, AVONET edhe një herë, kësaj radhe publikisht, i ka bërë thirrje urgjente Kryetarit të Komunës së Gjilanit, Alban Hysenit, që të ndërmarrë menjëherë hapat dhe veprimet e nevojshme ligjore në drejtim të vendosjes së ligjshmërisë në lidhje me këtë rast.
