Deputeti i PDK-së, Artan Behrami, theksoi se kryeministri në detyrë, Albin Kurti kushtëzojë vazhdimin e dialogut, vetëm një ditë pas deklaratës të presidentit Shteteve të Bashkuara të Amerikës, Donald Trump.
Behrami ka thënë se Kosova nuk është një projekt i frikës, por i sakrificës, i dialogut, i kompromisit dhe mbi të gjitha, i guximit.
Sipas tij, dikur, çdo hap politik dhe ushtarak në Kosovë është ndërtuar në koordinim të ngushtë me Uashingtonin.
“Pashë shumë reagime, pas deklaratës së Presidentit të SHBA-së, Donald Trump. Jo vetëm të qytetarëve, por edhe të një deputeti në detyrë që ka uzurpuar zyrën e kryeministrit e që po sillet si pronar i shtetit. Dikur, çdo hap politik dhe ushtarak në Kosovë e kemi ndërtuar në koordinim të ngushtë me Uashingtonin. Bashkë i kemi fituar të gjitha betejat! SHBA-ja kishte dhe ka rol vendimtar në çdo zgjidhje për Ballkanin pas Luftës së Ftohtë. Sot, kemi një pengmarrës të shtetit që bën gjithçka që ta largojë Amerikën nga Kosova”, ka shkruar Behrami në Facebook.
Ai ka theksuar po ashtu se “një sjellje vetëshkatërruese që ka më shumë lidhje me frikën personale, sesa me interesin shtetëror”.
“Çfarë bën Kurti pas deklaratës së Trump? I vendos kushte Amerikës. Kërkon dorëzimin e Radoiçiqit, të cilin vetë e kishte amnistuar. Kërkon nënshkrim për Marrëveshjen e Ohrit, të cilën e ka pranuar, pastaj mohuar, pastaj kërkuar garant, tani nënshkrim, më pas vulë. Pasnesër një noter. Tërheqja e letrës së Bernabiçit befas u bë pengesë!Natyrisht që bëhet, sepse ka pranuar largimin e njohjes reciproke nga marrëveshja”, shkruan Behrami.
Sipas tij, Kurti, është ai që në vitin 2020 ia hoqi Serbisë të gjitha kushtet: kërkimfaljen, të pagjeturit, dëmet e luftës.
Ai tha se Kurti po e përdor kushtëzimin vetëm si perde për t’u fshehur.
“Sot e përdor kushtëzimin vetëm si perde për t’u fshehur. Kur nuk ke vizion e përdor frikën. Kur nuk ke guxim, e zëvendëson me sabotim. Prandaj, zvarritja e krijimit të institucioneve, bllokimi i Kuvendit dhe Qeverisë, janë vetëm përpjekje për të mbajtur pushtetin në gjendje paniku. Por, frika e Kurtit nuk është frika e Kosovës. Kosova nuk është një projekt i frikës, por i sakrificës, i dialogut, i kompromisit dhe, mbi të gjitha, i guximit”, shkruan ai.
