Veriu.info ka raportuar dje, se si kompania ndërtimore “Medi Premium” po ndërton “Penthouse” pa leje në qendër të Mitrovicës, duke shkelur lejen e marrë për ndërtimin e një objekt banesor me etazhitet B+P+11.
Pas katër ditë pritje, sot Drejtoria e Inspeksionit e Komunës së Mitrovicës ka kthyer përgjigje për këtë mbindërtim pa leje, duke konfirmuar së kompanisë ndërtimore i janë ndaluar punimet dhe i është shqiptuar gjobë.
“Medi Premium” po ndërton “Penthouse” pa leje midis Mitrovicës, inspeksioni hesht (Foto/Dokument)
“Inspekcioni i ndërtimit në të gjitha objektet që janë të pajisura me leje ndërtimi, inspektohen rregullisht dhe me përpikëri. Për objektin në fjalë janë marrë të gjitha masat e nevojshme sipas ligjit, duke përfshirë: procesverbalin me nr. 00450 të datës 11.06.2025, procesverbali për gjobë mandatore me nr. 000066 i datës 13.06.2025 dhe aktvendimi me nr. prot. 05.354/01.0034568/25 i datës 13.06.2025”, ka thënë për Veriu.info Udhëheqës i sektorit të ndërtimit në Drejtorinë e Inspeksionit të Komunës së Mitrovicës, Vehbi Ahmeti.
Kryeinspektori i ndërtimit, Vehbi Ahmeti ka thënë se kompanisë “Medi Premium” i janë ndërprerë punimet, me ç’rast përgjigjes i ka bashkëngjitur edhe një fotografi ku shihet se në këtë mbindërtim pa leje është vendosur edhe shiriti.
“Në këtë rast, punimet nga pala janë ndërprerë, dhe është udhëzuar pala që brenda afatit të caktuar të respektojë plotësisht urdhrat e inspektorit dhe të veprojë në përputhje me lejen e ndërtimit, udhëzimet administrative dhe ligjet adekuate. Jemi në komunikim të vazhdueshëm me të gjitha palët për të siguruar që procesi të zhvillohet në përputhje me ligjin dhe normat në fuqi”, ka thënë kryeinspektori Ahmeti për Veriu.info.
Mirëpo, siç shihet në përgjigjen e Kryeinspektorit Vehbi Ahmeti, inspektimi është bërë me 11 qershor, ndërsa aktvendimi dhe gjoba nuk i është lëshuar kompanisë ndërtuese deri më datë 13 qershor.
Ku është esenca e datës së lëshimit të aktvendimit dhe gjobës?
Veriu.info më 12 qershor ka dërguar pyetje në Drejtorinë e Urbanizmit për t’i pyetur se a ka leje “Medi Preium” për ndërtimin e “Penthouse”, ku të nesërmen na u është konfirmuar zyrtarisht se nuk ka leje.
Po atë ditë, 13 qershor, Veriu.info ka dërguar pyetje për Drejtorinë e Inspeksionit, për të kuptuar se zyrtarët përkatës të Drejtorisë së Inspeksionit a kanë zhvilluar inspekime se a po zbatohet në terren projekti sipas lejes ndërtimore të lëshuar nga Drejtoria e Urbanizmit e Komunës së Mitrovicës dhe se çfarë masa do të ndërmarrin ndaj kompanisë “Medi Premium” për këtë mbindërtim që është në punim e sipër, ku mos intervenimi me kohë do të krijoj pasoja?
Si duket, pas këtyre pyetjeve të bëra zyrtarisht nga Veriu.info, zyrtarët e Drejtorisë së Inspeksionit janë gjendur para aktit të kryer dhe kanë vendosur nxjerrjen e aktvendimit dhe shqiptimit të gjobës, që i bie dy ditë pas ditës së inspeksimit.
Ndryshe, mbindërtimet pa leje në objekte banesore kanë për pasojë mospranimin teknik të objekteve të ndërtuara nga organet përgjegjëse komunale, ku në fund pësojnë blerësit e banesave në gjithë objektin, sepse asnjë pronar banese në atë objekt nuk mund të pajiset me fletë poseduese të pronës së tij, ndërkohë që inspektorët e ndërtimit kanë për obligim rrënimin e objekteve pa leje./Veriu.info
