Betim Hasi, zyrtar policor në Gjakovë, në rrjete sociale ka përkrahur dhunën fizike që kolegët e tij dyshohen se përdorën ndaj një personi në Klinë.
Në njërën nga faqet online në të cilën u publikua video-incizimi, derisa shihej se si bëhej arrestimi i një personi e më pas edhe sulmi fizik ndaj tij, Hasi ka shkruar një koment, duke thënë se rrahja sipas tij ishte meritore.“I ka shajte edhe e kane rre, rrahje meritore, tjeter here zyrtareve policore ju uroj fat ne lokacion pa kamera” – theksohet në komentin e tij.
Hasi është gjithashtu djali ish-eprorit policor në Gjakovë, Ahmet Hasi, ndërsa vetë ai shërben në Policinë e Kosovës që nga viti 2018.
Gjithashtu Hasi ishte në mesin e të suspenduarve katër vite më parë për një rast që pretendohej për rrahjen e një qytetari që ishte futur në të kuqe me veturë në semafor dhe se Hasi bashkë me kolegët e tij dyshohej se e kishin rrahur personin që kishte kryer kundervajtje.
Në lidhje me këtë koment, KALLXO.com ka tentuar të marrë një qëndrim nga Betim Hasi, por ai ka qenë i paqasshëm përmes telefonit.
Një ngjarje e cila u shënua në Klinë tashmë ka rezultuar me tre zyrtarë policorë të arrestuar. Në pamjet të cilët ka publikuar KALLXO.com shihet ngjarja kur dy zyrtarë policorë fillimisht e prangosin një person e më pas i treti e sulmon fizikisht me shuplaka e boksa derisa viktima ishte i lidhur me pranga.
