Aleanca për Ardhmërinë e Kosovës (AAK) ka thirrur për të hënën një mbledhje të Këshillit të Përgjithshëm, ku do të kompletohen dhe zyrtarizohen të gjitha kandidaturat për kryetarë komunash për zgjedhjet lokale që pritet të mbahen më 12 tetor.
Në zgjedhjet e 12 tetorit AAK në krye me Ramush Haradinajn pritet të kërkoj shpëtimin politik, pasi që kjo parti është drejt ‘fundosjes’ politike, për shkak të rezultatit të dobët në zgjedhjet parlamentare të mbajtura në shkurt 2025, nga të cilat fitoj vetëm pesë mandate deputetësh si parti, një rezultat ky më i dobëti që prej themelimit të AAK-së.
Veriu.info mëson se nëse AAK-ja nuk do të arrij t’i ruaj komunat që udhëheq, pas zgjedhjeve lokale Ramush Haradinaj do të jap dorëheqje nga kryetari i partisë, pozitë në të cilën pritet ta zëvendësoj Ardian Gjini.
Partia ka publikuar tashmë një pjesë të kandidatëve në disa nga komunat kryesore të vendit. Në komunat që aktualisht janë në drejtimin e AAK-së – Gjakovë, Klinë, Suharekë, Rahovec dhe Deçan – kryetarët aktualë do të garojnë për një mandat të ri katërvjeçar, duke synuar vazhdimësinë në udhëheqje.
Për komunat e tjera, AAK ka emëruar këta kandidatë: Ali Berisha për Pejën, Bekë Berisha për Prishtinën, Nazim Gagica për Gjilanin, Besnik Krasniqi për Prizrenin, Xhemile Murati për Ferizajn, Qazim Nimani për Mitrovicën, Faton Jakupi për Kamenicën, Agron Kuçi për Junikun, Ukë Blakaj për Istogun, Vildane Latifi për Fushë Kosovën, Baki Feta për Podujevën, Labinot Bislimi për Vitinë dhe Ilir Tasholli për Lipjanin.
