Sekretari i Përgjithshëm i NATO-s, Mark Rutte, ka theksuar rëndësinë e kujtimit të gjenocidit në Srebrenicë, me rastin e shënimit të 30-vjetorit të kësaj tragjedie.
Ai foli për tmerrin që ka shoqëruar këtë ngjarje dhe për rëndësinë e ndërtimit të një të ardhmeje më të ndritur për rajonin dhe botën.
Rutte theksoi se tragjedia e Srebrenicës nuk duhet të harrohet kurrë, duke shtuar: “Sot shënojmë 30-vjetorin e gjenocidit në Srebrenicë, një tragjedi që tronditi botën dhe që përgjithmonë lidhi vendin tim me tuajin. Kam vizituar Potoçarin si kryeministër i Holandës. Kurrë nuk do t’i harrojmë tmerret e atyre ditëve, dhe mendimet tona janë me të gjithë ata që u prekën. Është detyrimi ynë të ndërtojmë një të ardhme më të ndritur.”.
Duke folur për rolin e NATO-s në Bosnjë, ai u shpreh: “Dejtoni ndoshta nuk është i përsosur, por mbetet gur themeli për një Bosnje dhe Hercegovinë stabile. NATO ndërhyri në Bosnje për të ndihmuar në ndalimin e një konflikti që mori qindra mijëra jetë nga të gjitha komunitetet. Atëherë ishim pranë jush. Për 30 vjet kemi ofruar stabilitet në rajon. Jemi me ju sot dhe do të jemi edhe në të ardhmen. Nuk do të lejojmë një vakum sigurie, dhe ju nuk duhet të lejoni që retorika përçarëse t’ju tërheqë pas.”.
