Avokati Arianit Koci ka komentuar vendimin e Gjykatës Supreme për shfuqizimin e udhëzimit administrativ të nënshkruar nga deputeti Hekuran Murati.
Në emisionin “DPT te Fidani” në Klan Kosova, Koci theksoi se ky vendim tregon se aktualisht nuk ekziston një qeveri funksionale dhe as Kuvend, duke theksuar se sipas Gjykatës Supreme, organi më i lartë i drejtësisë, asnjë akt nënligjor nuk mund të miratohet nga Qeveria në këtë moment.
Ai kritikoi ashpër reagimin e Muratit, i cili sipas tij, në mënyrën më të keqe të mundshme, ka përmendur emrat dhe mbiemrat e gjyqtarëve të Gjykatës Supreme që kanë shfuqizuar udhëzimin, duke e cilësuar këtë si një veprim tipik të veprimtarisë së Vetëvendosjes.
“Tash po del nuk kemi as Qeveri, as Kuvend. Sipas vendimit të Gjykatës Supreme që organi më i lartë, po del që Qeveri me këtë kapacitet aktual nuk ka të drejtë asnjë akt nënligjor me e marrë. Për atë punë sot edhe reagoi ministri Hekuran Murati, në mënyrën më të keqe të mundshme, i përmendi me emra dhe mbiemra gjyqtarët suprem që e kanë shfuqizuar një udhëzim administrativ”.
“Kjo është forma tipike e veprimit të Vetëvendosjes. Nuk kam asnjë inat ndaj Vetëvendosjes, madje në një periudhë edhe e kam votuar, por kështu në këtë formë, me i targetu gjyqtarët, me emra, kjo është ftesë për me u targetu dhe me i sulmu, sidomos online”, u shpreh tutje Koci.
