Jakup Krasniqi, Kadri Veseli dhe Rexhep Selimi kanë marrë përgjigje negative për kërkesat e tyre për lirim të përkohshëm nga paraburgimi – edhe nga Dhoma e Apelit.
Edhe pse kërkesat i kanë bërë veçmas, përgjigjet rezultuan të njëjta – dhe shumë të ngjashme në përmbajtje. Aq shumë, sa që në disa raste është vërejtur përdorimi i metodës “copy-paste” në arsyetimet e gjykatës.
Vetë Krasniqi ka ngritur shqetësim për këtë çështje, pasi fillimisht kishte marrë një vendim në të cilin përmendej emri i Kadri Veselit, edhe në paragrafët që i përkisnin atij.
“Vendimi paraprak i është referuar z. Veselit, e jo z. Krasniqit, çka është tregues i fortë se vendimet janë përgatitur së bashku. Shto këtu faktin se z. Krasniqit i është shkelur e drejta për vlerësim të paraburgimit në përputhje me rrethanat e tij personale, duke e vendosur atë në disavantazh ndaj të akuzuarve të tjerë, pasi mes tyre ka dallime thelbësore. Z. Krasniqi nuk është përfshirë – as tërthorazi – në pengim të procesit,” deklaroi Venkateswari Alagendra, avokatja kryesore e Krasniqit.
Ish-kryetari i Kuvendit të Kosovës thekson se dallimi i vetëm real mes tij dhe të akuzuarve të tjerë është mosha – ai tashmë është 74 vjeç – dhe se kjo e vë në pozitë më të ndjeshme.
Një tjetër arsye kryesore për refuzimin e lirimit, sipas gjykatës, mbetet mungesa e garancive nga Policia e Kosovës, e cila nuk ka mundësi teknike për të përgjuar të akuzuarit edhe në ambientet e tyre private.
