Avokati i Popullit, Naim Qelaj ka pritur në takim disa nga redaktorët e Radiotelevizionit të Kosovës (RTK), Meneta Zekaj Nushi, Blerta Foniqi, Edona Musa Mustafa, Jehona Zhitia dhe Arton Mulliqi, të cilët shkuan atje për shprehur shqetësimet e tyre duke paraqitur ankesë kundër menaxhmentit për shkak të largimit të tyre nga moderimi i emisioneve informative në RTK.
Ata u shoqëruan në takim nga juristja për të drejtën e medias, Flutura Kusari, e cila monitoron punën e transmetuesit publik, RTK.
“Redaktorët ndanë me Avokatin e Popullit informacione rreth presionit dhe censurës së ushtruar nga menaxhmenti dhe efektin e ndikimeve politike në punën e tyre. Ata folën edhe për presionin e vazhdueshëm mbi stafin, trajtimin diskriminues dhe ndryshim të skemës programore pa aprovim paraprak sipas procedurave. Ankesat përfshijnë po ashtu edhe ndërhyrjet me motive politike dhe tendencat që në vazhdimësi kanë për qëllim ndërhyrje të hapur politike gjë që cenon rëndë pavarësinë dhe lirinë mediale të këtij mediumi”, thuhet në njoftimin e Avokatit të Popullit.
Avokati i Popullit theksoi se pavarësia e mediave publike nuk është privilegj i një institucioni, por një e drejtë themelore e qytetarëve për të marrë informacion të paanshëm, siç garantohet nga neni 10 i Konventës Evropiane për të Drejtat e Njeriut, por edhe me Kushtetutën e Republikës së Kosovës.
“Çdo ndërhyrje nga çdokush me qëllim të ushtrimit të kontrollit përmes bordeve apo presioneve editoriale janë cenim i kësaj të drejte dhe kthejnë një mjet të demokracisë në instrument propagande, gjë që nuk duhet të ndodhë në asnjë rrethanë në RTK”.
Avokati i Popullit theksoi se praktika e Gjykatës Europiane për të Drejtat e Njeriut flet për këtë gjë dhe përcakton si detyrim pozitiv të shtetit për të mbrojtur pluralizmin dhe pavarësinë editoriale të mediave publike, duke konsideruar se çdo kufizim i gazetarëve apo redaktorëve konsiderohet si shkelje e lirisë së shprehjes dhe të drejtës së publikut për informim.
Avokati i Popullit konsideron se përpjekjet “për të ushtruar ndikim politik mbi median publike janë të papranueshme, bien ndesh me standardet demokratike dhe përbëjnë rrezik serioz për lirinë e fjalës dhe besimin qytetar”.
Në fund, Avokati i Popullit theksoi se ankesat e parashtruara do të hetohen dhe për të gjitha pretendimet e ngritura do të informohen ankuesit dhe publiku.
