Në emisionin EURO n’T7 me Menduh Abazin është diskutuar për pasojat ekonomike si rrjedhojë e ngërçit politik.
Agim Shahini, kryetar i Aleancës Kosovare të Bizneseve, e ka përshkruar gjendjen ekonomike si shumë të rënduar si rrjedhojë e politikave të gabuara qeveritare.
Sipas tij, janë rreth 700 milionë euro të cilat, në mungesë të Kuvendit, nuk kanë hyrë në ekonominë e vendit dhe kjo ka ndikuar drejtpërdrejt në stagnimin ekonomik.
Jo vetëm kjo, sipas kreut të AKB-së, mungesa e investimeve kapitale, pastaj ndarja e bizneseve sipas orientimit politik, po e bën toksik ambientin e të bërit biznes në vend.
Si pikën më kulmore të politikave të gabuara qeveritare dhe institucioneve tjera vendore, Shahini e ka cilësuar rritjen enorme të çmimit të energjisë elektrike, e që pasojat, përveç bizneseve, do t’i paguajnë qytetarët e vendit duke paguar çmime më të larta për produktet vendore.
“E keqja e kësaj është që nga zhgënjimi bizneset po vendosin të ikin nga Kosova, që kapitalin e tyre të krijuar me vite ta bartin jashtë vendit. Pra nuk po kemi vetëm largim të qytetarëve, por tani kemi edhe largim të bizneseve me gjithë kapitalin e tyre. Ky është shqetësimi më i madh aktualisht, largimi i kapitalit nga Kosova, që do të thotë varfërim i mëtutjeshëm i vendit. Brenda 10 ditëve ne si AKB do të dalim me një studim ku do të tregojmë saktë se kah po lëviz kapitali i bizneseve vendore në mungesë të qeverisë së vendit”, ka thënë Shahini.
Në anën tjetër, Shahini ka parashikuar që vlera e importeve në vitin 2025 do të jetë mbi 7 miliardë euro, që është vlera më e lartë në historinë e re të Kosovës. Kjo do të thotë varfërim i mëtutjeshëm i vendit, ku përafërsisht kemi 17 milionë euro para të gatshme të qytetarëve që dalin jashtë vendit vetëm brenda një dite.
