Kryeministri në detyrë, njëherazi edhe kryetar i Lëvizjes Vetëvendosje, Albin Kurti, ka nisur fushatën në Mitrovicë bashkë me kandidatin për kryetar të kësaj komune, Faton Peci.
Bashkë u takuan me shumë qytetarë, të cilëve iu prezantuan programin që e sheh Mitrovicën me punësim për të rinjtë, me arsim modern, shëndetësi cilësore dhe shume investime, shkruan IndeksOnline.
“Fatoni është garancia që projektet tona bëhen realitet. Ai që do të udhëheqë me transparencë, do të punojë për çdo lagje dhe për çdo fshat, sepse e do këtë qytet dhe do t’i shërbejë pa dallim të gjithë qytetarëve të tij” u shpreh Kurti.
Por karakteristikë e këtij tubimi ishte pjesëmarrve të paktë, ku shumë prej karrigeve mbetën të zbrazëta, anipse ishin vetëm rreth 800 sosh.
Ky është postimi i plotë i Kurtit:
Për Mitrovicën e punësimit për të rinjtë, për Mitrovicën e arsimit modern, me shkolla të rinovuara dhe çdo fëmijë me kushte dinjitoze, të shëndetësisë cilësore, me qendra mjekësore moderne dhe një spital të ri, për Mitrovicën e gjelbër, me transport publik dhe me parqe për fëmijët, të bujqësisë e turizmit, që u jep mundësi fshatrave të jetojnë e të zhvillohen, numri është 105, kandidati është Faton Peci, data është 12 tetor, subjekti është Lëvizja VETËVENDOSJE!.
Fatoni është garancia që projektet tona bëhen realitet. Ai që do të udhëheqë me transparencë, do të punojë për çdo lagje dhe për çdo fshat, sepse e do këtë qytet dhe do t’i shërbejë pa dallim të gjithë qytetarëve të tij.
Ndërkaq në anën tjetër të Ibrit kemi kandidatë të guximshëm e të vendosur:
– Erden Atiq në Mitrovicën e veriut,
– Lulzim Hetemi në Leposaviq,
– Vedet Mehmeti në Zubin Potok,
– Fetah Peci në Zveçan.
Ata janë zëri i shpresës sonë për një veri që ecën me drejtësi dhe zhvillim.
