Pa licencë, me kontrata të dyshimta dhe sjellje arrogante ndaj prindërve, kopshti privat “Blini” në Prishtinë ka nxjerrë në pah probleme serioze për familjet që i besojnë fëmijët e tyre institucioneve parashkollore. N.M., prindi i një vajze 4-vjeçare, rrëfen se për një vit ka paguar 100 euro në muaj për gjysmë orari, ndërkohë që në kontratë shënohej vetëm 90 euro – dhe në shtator vajza e saj u përjashtua papritmas, pa asnjë paralajmërim.
Për N.M. shtatori i këtij viti nisi me zhgënjim të madh. Vajza e saj 4-vjeçare, e cila për dy vite me radhë kishte vijuar mësimet në këtë institucion, u përjashtua pa paralajmërim.
Sipas saj, vendimi u mor nga drejtoresha e kopshtit, Liridona Hajdari, e cila – sipas të dhënave – që nga dhjetori i vitit 2024 nuk posedon licencë për ushtrimin e aktivitetit.
Përjashtimi u shoqërua me një qasje arrogante, ndërsa Hajdari pretendoi se paraprakisht kishte dërguar një email njoftues – gjë që familja e mohon kategorikisht.
Se kopshti “Blini” nuk ka licencë, për Gazetën Insajderi e ka konfirmuar edhe Ministria e Arsimit, Shkencës dhe Teknologjisë.
“Institucioni në fjalë nuk ka marrë aprovimin nga Komisioni për Licencim/Rilicencim gjatë procesit të mëparshëm të shqyrtimit. Aktualisht, institucioni gjendet në procedurë të rilicencimit, në përputhje me kriteret dhe dispozitat ligjore në fuqi, të përcaktuara nga legjislacioni përkatës”, thuhet në përgjigjen e MAShT.
“Na mashtruan dhe na përjashtuan pa paralajmërim” – rrëfimi i prindit që denoncon kopshtin “Blini” në Prishtinë
N.M. tregon se para fillimit të vitit të ri shkollor ishte paraqitur në kopsht për të kryer pagesën mujore, siç kishte bërë çdo vit. Por aty e priste një surprizë e pakëndshme.
“Shkova në kopsht, desha ta kryej pagesën, më thanë: ‘Na vjen keq, vajza juaj nuk është më pjesë e institucionit’. U habita. Ju thashë se vetëm para pushimeve të verës ishim përshëndetur me fjalët ‘shihemi në shtator’. Ishte zhgënjim i madh”, kujton ajo.
Pas kësaj, prindi filloi të hetojë më shumë dhe zbuloi parregullsi të tjera. Sipas saj, drejtuesit e kopshtit nuk kishin licencë dhe aplikonin çmime në kundërshtim me kontratat zyrtare.
“Unë për një vit kam paguar 100 euro në muaj për gjysmë orari, ndërkohë që në kontratë – që sipas gjasave nuk është valide – shkruan 90 euro. Pra, jo vetëm që nuk kishin licencë, por edhe na kishin mashtruar financiarisht”, tha ajo për Insajderin.
Kur kërkoi sqarim zyrtar, situata u përkeqësua. Mësueset e punësuara nga drejtoresha i komunikuan se fëmija nuk mund të vijonte më mësimin. N.M. kontaktoi përfaqësuesit e institucionit dhe kërkoi shpjegim me shkrim.
“I shkrova dhe kërkova sqarim. Tentuan të më mashtrojnë duke thënë se ma kishin dërguar një email për shkëputje të kontratës. Kam edhe screenshotin – një email i tillë nuk më ka ardhur kurrë. Pastaj më thanë se nuk kishte më vende të lira sepse kishin pranuar fëmijë nga lista e pritjes. Për emailin, më thanë se mund të ketë qenë ‘gabim teknik’”, rrëfen ajo.
Prindit iu propozua që vajza të mbetej pa shkollë deri në muajin tetor, “me shpresën se ndoshta atëherë do të lirohej një vend”.
“Vajza e pelqente shumë kopshtin, kishte krijuar afërsi me mësueset dhe shoqëri me fëmijët. Unë isha e gatshme të paguaj edhe për mësim tërditor – në kontratë shënohet 150 euro në muaj – por një opsion i tillë as nuk më u ofrua. Ky mungesë korrektësie dhe profesionalizmi më shtyu ta denoncoj publikisht rastin. Tani që pas hulumtimeve të mia kam kuptuar se kopshti nuk ka licencë, ndihem e lehtësuar që vajza ime nuk është më pjesë e tij”, deklaroi ajo.
Prindi shton se menjëherë ka gjetur një kopsht tjetër me standarde më të larta, por denoncimi bëhet për t’i vënë në dijeni prindërit e tjerë.
“Dua që prindërit të jenë të vetëdijshëm se çfarë mund t’i presë nëse i dërgojnë fëmijët e tyre në kopshtin ‘Blini’”, potencoi ajo.
Si tentoi të mohojë përgjegjësinë drejtoresha
Gazeta Insajderi kërkoi koment edhe nga drejtoresha Liridona Hajdari.
Ajo fillimisht mohoi akuzat: “Prindërit janë njoftuar paraprakisht, përmes emailit zyrtar, rreth një muaj e gjysmë përpara ndryshimeve që janë bërë në institucion. Pra, nuk ka pasur vendime të papritura pa komunikim.”
Kur Insajderi kërkoi të shihte provën e emailit, Hajdari nuk dha më asnjë përgjigje.
Për më tepër, ajo shtoi se: “Fëmijët largohen vetëm në rastet kur prindërit nuk respektojnë kushtet e kontratës.”
“Kushtet e kontratës”, të cila bie në “ujë” për shkak se kopshti dyshohet se tash e 10 muaj po funksionin pa licencë.
Në anën tjetër, edhe vet Hajdari konfirmoi se kopshti aktualisht është në proces rilicencimi: “Kopshti ‘Blini’ ka qenë i licencuar dhe aktualisht ndodhet në procedura të rillicencimit sipas afateve dhe kërkesave ligjore të organeve kompetente. Të gjitha procedurat tona zhvillohen me transparencë të plotë dhe në përputhje me ligjin. Jemi të hapur për bashkëpunim dhe për të ofruar dokumentacionin përkatës”, tha ajo për Insajderin.
Kontratën që e ka parë Insajderi, përveç faktit që mund të konsiderohet jo valide, paraqet dyshime edhe në përmbajtje, pasi nuk përcakton qartë periudhën për të cilën lidhet.
Bie në sy, pjesa për pagesa – më sakte i emëruar si Neni 6 i kontratës ku thuhet “Prindi/kujdestari është i obliguar që në javën e parë të muajit t’i kryejë obligimet financiare ndaj institucionit në shumën prej 150 euro. Dy fëmijë të një prindi: 140 euro zbritje. Gjysmë orari: 90 euro.”
Sipas prindit denoncues, ky nen nuk është respektuar, pasi ai ka paguar për një vit rresht 100 euro në muaj për gjysmë orari mësimi.
Për të sqaruar situatën në detaje, Insajderi ka dërguar pyetje shtesë në adresën e drejtoreshës, por deri në publikimin e shkrimit nuk ka marrë përgjigje.
