Katër vite më parë, Fadil Nura premtoi ndryshime dhe projekte madhore për qytetin e Skenderajt. Sot, me pak ditë larg zgjedhjeve të reja lokale, shumë nga premtimet e tij duket se kanë mbetur vetëm fjalë. Nga 66 premtime të bëra gjatë mandatit 2021-2025, vetëm gjysma janë realizuar, ndërsa 7 prej tyre nuk kanë filluar fare, shkruan Insajderi.
Mes projekteve të papërmbushura spikatin disa që premtuan të ndryshonin fytyrën e qytetit.
Ndërtimi i një nënkalimi në sheshin qendror, një premtim që do të lehtësonte trafikun dhe sigurinë e qytetarëve, nuk ka filluar ende. Po ashtu, premtimi për krijimin e një zyre të veçantë për investimet e huaja nga diaspora mbetet i pazbatuar.
Kryetari aktual kishte premtuar gjithashtu ndërtimin dhe hapjen e muzeve që pasqyrojnë krimet e Serbisë gjatë luftës në Izbicë, Çirez dhe Rezallë, si dhe konservimin e Xhamisë së Çirezit dhe shndërrimin e saj në muze të luftës – projekte që nuk kanë parë ende dritën e realizimit.
Në fushën e infrastrukturës rurale, ndërtimi i pendës së ujit në Kuçicë mbetet gjithashtu një premtim i pambajtur.
Edhe në aspektin social, Nura kishte premtuar rritjen e kujdesit për fëmijët që jetojnë vetëm me njërin prind, një iniciativë që nuk është nisur fare.
Sipas të dhënave të Institutit GAP, nga 66 premtime gjithsej, vetëm 34 janë realizuar, 14 figurojnë gjysmë të përmbushura, ndërsa 11 kanë filluar minimalisht.
Gazeta Insajderi ka kërkuar përgjigje nga Komuna e Skenderajt për arsyet e mosrealizimit të këtyre projekteve, por deri më tani nuk ka marrë asnjë përgjigje.
Ky mandat ishte i pari për Fadil Nurën, por ai nuk do të jetë kandidat në zgjedhjet e 12 tetorit, ku Partia Demokratike e Kosovës ka vendosur Sami Lushtakun si kandidat për kryetar të komunës.
Në garë me Lushtakun ka dalë Hysni Mehani nga Lëvizja Vetëvendosje.
