Opinion
Sipas raportimit në media, thuhet se janë suspenduar katër policë specialë të Policisë së Kosovës! Siç thuhet ata janë suspenduar sepse kanë diskutuar apo përqeshur Dimal Bashën në grup të mbyllur të rrjetit social apo komunikimit!
Suspendimi është masë e rëndë e përgjegjësisë disiplinore. Suspendimi vendoset për shkelje të rënda disiplinore.
Në asnjë rast kjo shkelje e pretenduar nuk hyn në korpusin e shkeljeve të rënda!
Kjo më së shumti nëse konstatohet nga organi përkatës mund të hyjë në korpusin e shkeljes së lehtë. Në rast se konstatohet shkelje e lehtë, atëherë janë masat disiplinore si; Vërejtje me gojë, vërejtje me shkrim, zbritje në pagë etj.
Njëherit gjithnjë duhet aplikuar rrethanat lehtësuese të parapara me akt nënligjor të Policisë, e këto janë sjellja e mirë, aktivitetet e sukseshme e shumë tjera. Katër policët në fjalë kanë punuar me zell në detyra speciale kryesisht në veri të vendit, duke rrezikuar jetën e tyre, prandaj vetëm kjo punë e tyre me vetëmohim do të mjaftonte që edhe nëse eventualisht kanë kryer shkelje të lehtë, eprorët e tyre ti ftonin në zyrë pa publicitet, ti jepnin vërejtje verbale, dhe do të përfundohej çështja sipas akteve ligjore në fuqi. Rregullativa ligjore moderne e përgjegjësisë disiplinore dekadave të fundit ka ndryshuar në mënyrë të konsiderueshme me çrast kufizohet pushteti disiplinor i punëdhënësit dhe shkohet në drejtim të mbrojtjes së të punësuarit.
Policët e special janë aset nacional i sigurisë, në rrethanat normale konsiderohen të tillë e lërë më në rrethanat e paqëndrueshme të këtyre viteve. Policët special duhet të jenë të mbrojtur, të motivohen, të stimulohen gjatë kryerjes së detyrës së tyre.
