Katër zyrtarët policorë në Prizren, të cilët javë më parë u suspenduan pasi kishin komentuar në një grup privat në Viber zgjedhjen e Dimal Bashës si kryetar i Kuvendit Komunal, janë rikthyer në punë.
Burime të Jepi zë bëjnë të ditur se pas shqyrtimit të rastit është vërtetuar se veprimet e tyre nuk kanë përbërë shkelje ligjore, dhe si rezultat, masa e suspendimit është hequr.
Suspendimi i përkohshëm i katër policëve kishte ngjallur reagime të shumta, pasi ishte bërë vetëm mbi bazën e komenteve të tyre në një grup privat. Vendimi për suspendim, i nënshkruar nga drejtori rajonal i Policisë në Prizren, kishte paraparë largimin nga detyra për tri ditë dhe dorëzimin e kartelave të identifikimit, armëve dhe pajisjeve zyrtare.
Në atë kohë, Inspektorati Policor i Kosovës kishte deklaruar se nuk kishte dhënë asnjë rekomandim për suspendim, duke lënë hapur dyshimet për ligjshmërinë e vendimit. Rasti u raportua gjerësisht nga mediat.
Me kthimin e tyre në detyrë, katër policët i rikthehen obligimeve të përditshme, ndërsa ky rast ka hapur debat publik për kufijtë mes fjalës së lirë në hapësira private dhe disiplinës policore.
