Gjykata Themelore në Mitrovicë – Dega në Vushtrri përmes gjyqtarit të procedurës paraprake ka vendosur të caktoj masën e paraburgimit prej një muaji për Avdullah Gerbeshi, Rrahman Gerbeshi dhe Kadri Gerbeshi, ndërsa Emin Gerbeshi e ka lënë të lirë duke ia vendosur disa kufizime, raporton Veriu.info.
Njoftimi i gjykatës:
Gjykata Themelore në Mitrovicë – Dega në Vushtrri, Departamenti i Përgjithshëm – Divizioni Penal, përmes gjyqtarit të procedurës paraprake, ka vendosur me aktvendim në tri çështje të ndara penale, lidhur me kërkesat e Prokurorisë Themelore në Mitrovicë për caktimin e masës së paraburgimit ndaj katër të pandehurve: K.G., E.G., A.G. dhe Rr.G., ashtu që:
1. Në çështjen penale kundër të pandehurit K.G., për shkak të veprave penale “Lëndim i lehtë trupor “ nga neni 185 par. 1 nën par. 1.4 të KPRK-së dhe veprës penale ”Arratisja e personit të privuar nga liria” nga neni 397 par. 1 të KPRK-së, duke vendosur sipas kërkesës së Prokurorisë Themelore Mitrovicë, për caktimin e masës së paraburgimit ndaj këtij të pandehuri, Gjykata Themelore Mitrovicë – Dega në Vushtrri, Departamenti i Përgjithshëm, Divizioni Penal, ka vendosur të aprovojë kërkesën e Prokurorisë dhe ka caktuar masën e paraburgimit në kohëzgjatje prej një (1) muaji, që llogaritet nga data 21.09.2025 deri më 21.10.2025.
2. Në çështjen penale kundër të pandehurve A.G. dhe E.G., për shkak të veprës penale “Detyrimi” nga neni 328 par. 2 lidhur me par. 1 si dhe nenin 31 dhe 77 të KPRK-së, duke vendosur sipas kërkesës së Prokurorisë Themelore Mitrovicë, për caktimin e masës së paraburgimit ndaj të pandehurit E.G., ka refuzuar kërkesën e Prokurorisë Themelore në Mitrovicë për caktimin e masës së paraburgimit dhe ndaj të pandehuri E.G. dhe ndaj tij është caktuar masa e ndalimit për t’iu afruar vendit dhe personit të caktuar, ashtu që të pandehurit E.G., i ndalohet që t’i afrohet pronës së palës së dëmtuar A.A. në fshatin … – komuna …dhe personit A.A. në distancë prej 100 metra.Kjo masë, sipas këtij aktvendimi, do të zgjasë 1 (një) muaj, duke filluar nga data 21.09.2025, e deri më 21.10.2025.
3.E e ka aprovuar kërkesen e Prokurorise Themelore ne Mitrovicë për caktimin e masës së paraburgimit ndaj dy të pandehurëve A.G. dhe Rr.G., për shkak se ekziston dyshimi i bazuar se kanë kryer veprën penale “Detyrimi në tentativë” nga neni 328 par. 2 lidhur me par. 1 e lidhur me nenin 28 dhe 31 të KPRK-së dhe veprën penale “Mbajtja në pronësi, kontroll ose posedim të paautorizuar të armëve” nga neni 366 par. 1 të KPRK-së.Paraburgimi sipas këtij aktvendimi, të pandehurve i llogaritet nga data 21.09.2025, e do të zgjasë deri me datën 21.10.2025.
