Kryetari i Vushtrrisë, Ferit Idrizi, i cili po garon edhe për një mandat në krye të kësaj komune, ka vazhduar aktivitetet në kuadër të fushatës parazgjedhore për zgjedhjet lokale të 12 tetorit.
Gjatë ditës së sotme, ai është takuar me përfaqësues të bizneseve lokale, ku ka premtuar mbështetje të vazhdueshme, duke theksuar se zhvillimi ekonomik është “shtylla kryesore e përparimit të komunës”.
“Sot bashkë me ekipin vizituam biznesin Extra Color në Vushtrri, ku u pritëm me respekt nga pronarët Rexhep Rexha dhe Ibrahim Çerkezi, dy njerëz të jashtëzakonshëm dhe të përkushtuar të qytetit tonë. Kënaqësi e madhe të shohësh punën e palodhur të tyre për zhvillimin e biznesit dhe rritjen e ekonomisë vendore”, ka shkruar Idrizi.
Ai vizitoi edhe fabrikën e mobilieve “Albed”, të cilën e cilësoi si shembull të suksesit vendor.
“‘Albed’ është shembull i një biznesi të suksesshëm vendor, i cili me punë të palodhshme ka arritur të krijojë produkte cilësore dhe vende pune për qytetarët tanë. Ne do të vazhdojmë të jemi përkrahës të bizneseve të Vushtrrisë, sepse zhvillimi ekonomik është shtylla kryesore e përparimit të komunës sonë”, ka premtuar Idrizi.
