Udhëheqës nga Evropa dhe Lindja e Mesme kanë mirëpritur një plan të ri të Shteteve të Bashkuara për Gazën, përderisa presidenti amerikan, Donald Trump, e paralajmëroi Hamasin që ta pranojë atë.
Në planin për të cilin kanë arritur pajtueshmëri Trumpi dhe kryeministri izraelit, Benjamin Netanyahu, propozohen përfundimi i menjëhershëm i operacioneve ushtarake si dhe lirimi i 20 pengjeve të gjalla izraelite si dhe i mbetjeve të dhjetëra të tjerave nga Hamasi brenda 72 orëve në këmbim të lirimit të qindra banorëve të Gazës të burgosur nga Izraeli, raporton televizioni BBC.
Një burim palestinez i afërt me bisedimet për armëpushim i tha televizionit publik britanik se zyrtarëve të Hamasit u është dorëzuar plani 20-pikësh i Shtëpisë së Bardhë.
Me këtë plan kërkohet që Hamasi të mos ketë rol në qeverisjen e Gazës, ndërsa lihet dera hapur për themelimin e një shteti palestinez.
Duke folur në një konferencë për gazetarë pas bisedimeve me Netanyahun në Shtëpinë e Bardhë, Trumpi e quajti planin “një ditë historike për paqen”.
Në një deklaratë të përbashkët, ministrat e jashtëm të Emirateve të Bashkuara Arabe, Arabisë Saudite, Katarit, Egjiptit, Jordanisë, Turqisë, Indonezisë dhe Pakistanit thanë se i mirëpresin “lidershipin e Trumpit dhe përpjekjet e tij të sinqerta për t’i dhënë fund luftës në Gaza”.
Presidenti i Këshillit Evropian, Antonio Costa, tha se ai është “i inkurajuar nga përgjigjja pozitive e kryeministrit Netanyahu” ndaj propozimit. Ai shtoi se “të gjitha palët duhet ta shfrytëzojnë këtë moment për t’i dhënë paqes një mundësi të vërtetë”.
