Meteorologu kosovar, Mendim Rugova, ka thënë se reshjet e borës në Prishtinë kanë shënuar rekord si për nga data e reshjeve, si për nga sasia.
Rugova ka treguar se trashësia e borës së rënë ka shkuar në 10 centimetra dhe se data 3 tetor është më e hershmja e shënuar.
Ai ka treguar se deri tani 7 tetori i 2017-ës ka qenë data më e hershme kur reshjet e borës kanë krijuar edhe shtresë prej 1 centimetër.
Postimi i plotë:
Në Prishtinë shënohet data më e hershme e tetorit me shtresë dëbore
3.10.2025 – Me një shtresë prej 10cm borë, data e 3 tetorit është më e hershmja përgjatë muajit tetor në Prishtinë ku reshjet e dëborës formojnë një shtresë. Deri më tani 7 tetori i 2017-ës ishte dita më e hershme që bie borë në Prishtinë dhe formon shtresë, dhe atë vetëm prej 1cm.
Kjo shtresë e sotme prej 10cm, është më e larta, pra rekorde për muajin tetor. Më 1997 e 2003 kishte pasur shtresa dëbore, por vetëm prej 4cm, dhe atë krejt nga fundi i tetorit, më 28 tetor 1997, dhe 27 tetor 2003. Patjetër që shkaku i topografisë së Prishtinës, trashësia e borës mund të ndryshojë, meqenëse në pjesë më të ulëta, shtresa mund të jetë më e ulët.
