Veprimtaria e shumë prej institucioneve private shëndetësore në Kosovë është kthyer në sfidë për shtetin, pasi që ato po operojnë vazhdimisht në mënyrë të kundërligjshme me shërbime të palicencuara dhe staf ilegal (të palicencuar), gjë që paraqet edhe rrezik për shëndetin dhe jetën e pacientëve.
Veriu.info ka siguruar një vendim të Inspektoratit Shëndetësor të Ministrisë së Shëndetësisë, me të cilin institucioni privat shëndetësor “Intergen” Sh.P.K. me themelues Gulay Ceylaner në Prishtinë është gjobitur me 4 mijë euro për shkelje të dispozitave të Ligjit për Shëndetësi.
Në arsyetimin e vendimit të Inspektoratit Shëndetësor për gjobitjen e qendrës së gjenetikës ”Intergen”, që në rrjete sociale vepron me emrin “Intergen Genetics Kosova”, thuhet se gjatë inspektimit të realizuar më 21 prill 2026 është konstatuar se ky institucion privat shëndetësor ofron pa licencë shërbime laboratorike të avancuara të natyrës molekulare/gjenetike.
“Gjatë inspektimit u evidentua se dokumentacioni i prezantuar lidhur me analizat laboratorike të avancuara të natyrës molekulare/gjenetike përbëhej nga raporte të lëshuara nga laboratorë jashtë vendit, të hartuara në gjuhën angleze dhe të nënshkruara nga profesionistët përkatës, gjegjësisht z. Serdar Ceylaner MD Medical Geneticist dhe z. Gulay Ceylaner, MD professor Medical Genetics, të pajisura me nënshkrimin elektronik të tyre, por pa faksimil përkatës. Gjithashtu, gjatë inspektimit u prezantua dokumentacion lidhur me laboratorin bashkëpunues në Turqi, i hartuar në gjuhën turke, i panoterizuar dhe pa përkthim zyrtar, çka e vështirëson verifikimin e plotë të përmbajtjes, vlefshmërisë dhe bazës së bashkëpunimit të pretenduar”, thuhet në vendimin për gjobitjen e qendrës së gjenetikës ”Intergen”.
Po ashtu, inspektorët kanë gjetur si shkelje edhe çmimoren me listën e analizave laboratorike të avancuara të natyrës molekulare/gjenetike të ofruara për pacientë, të cilat nuk kanë rezultuar të jenë të lajmëruara dhe licencuara në DLA-MSh.
“Institucioni privat shëndetësor “Intergen Shpk”-Ambulancë Specialistike e Pediatrisë dhe Laborator Mjekësor Biokimik Hematologjik, Prishtinë, me themelues z. Gulay Ceylaner ka shkelur dispozitat ligjore në fuqi Nenin 42, paragrafi 1, të Ligjit Nr. 04/L-125 për Shëndetësi, sanksionuar kjo me Nenin 94, të Ligjit për Shëndetësi, plotësuar dhe ndryshuar me Nenin 3, paragrafi 1, nënparagrafi 1.2, të Ligjit Nr. 08/L-043 për ndryshimin dhe plotësimin e Ligjit Nr. 04/L-125, për Shëndetësi”, thuhet në vendimin e Inspektoratit Shëndetësor që mban numër protokolli 05-765, të cilin e ka siguruar Veriu.info.
Çka thotë “Intergen” Sh.P.K.?
Veriu.info ka marrë edhe qëndrimin e qendrës së gjenetikës ”Intergen” lidhur me gjetjet e inspektorëve shëndetësorë dhe gjobën e shqiptuar, të cilët kanë treguar se gjobën nuk e kanë paguar akoma.
“Gjobën sigurisht që do ta paguajmë, mirëpo nuk kemi ndërmarrë asnjë hap pa përfunduar fillimisht shqyrtimin nga juristët tanë. Tashmë ata e kanë përfunduar analizën e tyre dhe, për këtë arsye, pagesa do të kryhet javën e ardhshme. Qendra jonë ndodhet aktualisht në prag të një organizimi edhe më të avancuar. Për këtë arsye, inspektimi është zhvilluar në një periudhë kur po realizoheshin mirëmbajtje dhe zëvendësime të pajisjeve, prandaj ai nuk pasqyron plotësisht gjendjen dhe kapacitetin aktual të qendrës. Pas përfundimit të këtyre ndryshimeve, qendra do të jetë në gjendje të ofrojë shërbime edhe më cilësore dhe me përfitim më të madh për vendin. Qendra jonë ka ofruar shërbime klinike dhe laboratorike vetëm në fushat për të cilat është e licencuar. Analizat që nuk kanë qenë pjesë e licencës sonë janë kryer në laboratorët tanë të tjerë të licencuar në fushën e gjenetikës. E njëjta praktikë zbatohet si në qendrën tonë, ashtu edhe në laboratorët e tjerë në Kosovë. Mundësimi që pacientët të kenë qasje në analiza që nuk kryhen brenda vendit sjell përfitime të rëndësishme për shëndetin e tyre. Këto analiza realizohen vetëm kur konsiderohen të nevojshme nga mjekët që ndjekin trajtimin e pacientit”, thuhet në përgjigjen e “Intergen” për Veriu.info.
Kush është ”Intergen” Sh.P.K.?
Qendra e gjenetikës ”Intergen” është pjesë e kompanisë “Intergen” Sh.P.K. e themeluar në vitin 2024 në Prishtinë, ku 90% të aksioneve i zotëron kompania turke “Intergen Genetik ve Nadir Hastaliklar Tani Arastirma ve uygulama Merkezi Anonim Sirketi”, ndërsa aksionarë me nga 5% janë Gulay Ceylaner dhe Serdar Ceylaner.
Drejtor menaxhues ”Intergen” Sh.P.K. është Gulay Ceylaner, përderisa kompania si aktivitet kryesor të deklaruar në ARBK e ka aktivitetin e spitaleve.
LEXONI EDHE:
