Veprimtaria e shumë prej institucioneve private shëndetësore në Kosovë është kthyer në sfidë për shtetin, pasi që ato po operojnë vazhdimisht në mënyrë të kundërligjshme me shërbime të palicencuara dhe staf ilegal (të palicencuar), gjë që paraqet edhe rrezik për shëndetin dhe jetën e pacientëve.
Veriu.info ka siguruar një vendim të Inspektoratit Shëndetësor të Ministrisë së Shëndetësisë, me të cilin klinika e specializuar në mbjellje të flokëve dhe trajtimeve estetike “Trandevue” Sh.P.K. me themelues Abdulalban Musliu në Prishtinë është gjobitur me 2 mijë euro për shkelje të dispozitave të Ligjit për Shëndetësi.
Në arsyetimin e vendimit të Inspektoratit Shëndetësor për gjobitjen e qendrës së gjenetikës “Trandevue”, që në rrjete sociale vepron me emrin “Trandevue Clinic”, thuhet se gjatë inspektimit të realizuar më 14 maj 2026 është konstatuar se ky institucion privat ofron shërbime shëndetësore të transplantit të flokëve, transplantit të veturllave dhe PRP në mënyrë të kundërligjshme, pasi që këto shërbime nuk i ka të lajmëruara e as licencuara në Divizionin për Licencim dhe Akreditim të Institucioneve Shëndetësore në Ministrinë e Shëndetësisë.
Për shkak të këtyre gjetjeve, në fund të inspektimit, Inspektorati Shëndetësor me procesverbal i ka ndaluar klinikës “Trandevue” ushtrimin e veprimtarisë së transplantit të flokëve, transplantin e vetullave dhe PRPderi në lajmërimin në Divizionin për Licencim dhe Akreditim të Institucioneve Private Shëndetësore në Ministrinë e Shëndetësisë, përkatësisht deri në licencimin e tyre.
Me rastin e këtij inspektimi, inspektorët kanë bërë gjetje skandaloze në “Trandevue Clinic”, pasi që aty kanë zbuluar se rreth 300 pacientë kanë marrë shërbime të palicencuara në Ministrinë e Shëndetësisë
Madje, inspektorët shëndetësorë kanë konstatuar se “Trandevue Clinic” ka reklamuar në mënyrë aktive shërbimet e transplantit të flokëvë, duke krijuar perceptimin e ofrimit të rregullt të këtyre shërbimeve për publikun.
Veriu.info ka tentuar të marrë një qëndrim nga “Trandevue” Sh.P.K. për këtë vendim të Inspektoratit Shëndetësor, por deri në momentin e publikimit të artikullit nuk ka pranuar përgjigje për pyetjet e dërguara.
Pra, me 14 maj 2026 klinikës “Trandevue” i ishte ndaluar transplanti i florëve, por nga një kërkim i thjeshtë në faqen e saj në Facebook, shihet se kjo klinikë ka vazhduar transplantet e flokëve të paktën nga data 23 maj, përderisa vendimi nga inspektorët shëndetësorë është lëshuar më 22 maj.
LEXONI EDHE:
