Gazetari dhe publicisti i njohur, Adriatik Kelmendi ka komentuar situatën politike në Kosovë, pas pezullimit të dialogut të planifikuar strategjik të ShBA-së me Kosovën.
Në emisionin “Kosova Today”, Kelmendi tha se situata është alarmante, dhe është e çuditshme se si populli qëndron aq qetë, transmeton Klankosova.tv.
“Pra situata është alarmante, nganjëherë po çuditem se sa të relaksuar jemi, duke parë se sa larg ka shkuar kjo qasje, sa që aleati ynë kryesor ka aq shumë kritika ndaj qasjes që Kosova dhe liderët e saj, në këtë rast zotëri Kurti, e ka ndaj kërkesave të tyre. Unë besoj se ata kanë ardhur deri në pikën kur të bëjnë me gisht, se kush është fajtori. Dhe mos të them për herë të parë, është shumë specifike kur ata drejtohen me emër dhe mbiemër të përveçëm”, u shpreh autori i emisionit “Rubikon” në Klan Kosova.
Ndër të tjera, gazetari e quan të dhimbshme situatën në të cilën ndodhet vendi.
“Është e dhimbshme që ndodhemi në këtë situatë, si një shtet dhe një popull që ka nevojë për mbështetje ndërkombëtare, që për shkak të mbështetjes ndërkombëtare, me rolin kryesor të Shteteve të Bashkuara të Amerikës, kemi arritur edhe të çlirohemi, të gëzojmë të drejtën e fjalës së lirë, dhe të kemi edhe shtetin tonë, e madje edhe ushtrinë tonë”.
“Kjo është fatkeqe që vetëm 26 vjet pasi arritëm çlirimin, pastaj këto vite që e kemi shtetin, ne të vijmë në situatë ku ky shtet [ShBA] na kritikon, ose ky shtet e kritikon njërin nga udhëheqësit tanë. Dhe në anën tjetër e shpërblen, siç ndodhi me dialogun strategjik, Serbinë, një shtet të cilin e ka bombarduar për ne”, deklaroi Kelmendi.
