Zyrtarja e Trepçës akuzon drejtorin Shyqri Sadiku për keqmenaxhim dhe abuzim me pozitën Zyrtarja e ndërmarrjes “Trepça”, Valdete Shabani, ka reaguar ashpër ndaj drejtorit të minierës, Shyqri Sadiku, duke e akuzuar atë për keqmenaxhim, abuzim me detyrën dhe shkatërrim të karrierës së punëtorëve të ndershëm të kësaj ndërmarrjeje.
Në reagimin e saj, Shabani ka deklaruar se Sadiku për vite të tëra ka manipuluar dhe ndëshkuar punëtorët që kanë kërkuar drejtësi, ndërsa ka keqpërdorur pozitën e tij duke u mbrojtur politikisht.
“Sipas saj, kryeministri është njoftuar disa herë për keqmenaxhimet, padrejtësitë dhe abuzimet që kanë ndodhur në Trepçë, por nuk ka ndërmarrë asnjë veprim për të mbrojtur punëtorët.
” Shabani ka theksuar se prania e kryeministrit në një tubim politik ku ishte i pranishëm edhe Sadiku, në orët e vona të natës, tregon mungesë vullneti për t’u përballur me problemet e vërteta të punëtorëve. Ajo gjithashtu ka ngritur dyshime lidhur me transferimin e Sadikut nga Vushtrria në Mitrovicë, duke e cilësuar këtë si një veprim me prapavijë politike dhe personale, që sipas saj “nuk ka të bëjë me meritë, por me interesa të errëta”.
Në fund, Shabani ka theksuar se drejtësia mund të vonojë, por nuk harron, duke paralajmëruar se “as mbrojtjet politike dhe as tubimet elektorale nuk do ta shpëtojnë më atë që i ka bërë punëtorëve”. Ajo i është drejtuar edhe kryeministrit me mesazhin se “për sa kohë që në Trepçë vazhdojnë të jenë njerëz si Shyqri Sadiku dhe klani i tij, qeveria nuk do të marrë votën e punëtorëve”.
