Bekim Jashari ka përzgjedhur fjalët më emocionuese, për të uruar fejesën e djali ë tij, Hamzës.
Në një mesazh të ngarkuar me simbolikë historike dhe emocionale, Jashari thekson se kjo ngjarje shënon “triumfin e dytë të familjes”, pas sakrificës për mbrojtjen e pragut të shtëpisë dhe kushtrimit për liri, fiks 28 vjet më parë, shkruan IndeksOnline.
Ai rikujton fjalët e Hamëz Jasharit se kjo tokë “veç këmbën e shqiptarit e duron”, duke e lidhur gëzimin familjar me idealin e lirisë.
Bekimi ka postuar fotografi familjare nga kjo ditë e veçantë, përfshirë dhe ato të Hamzës dhe të fejuarës së tij, pranë varrezave të Jasharajve dhe shtëpisë muze të tyre.
Sipas tij, Hamëza, i cili mban me krenari emrin e gjyshit, u fejua me Enesën në Kosovën e lirë – një Kosovë e ndërtuar mbi themele të forta, të vendosura nga të rinjtë dëshmorë që sakrifikuan për lirinë e vendit.
“Gëzime të tilla na zgjojnë kujtimin e babës Shaban, Kryekomandantit Adem dhe Babushit, që betejën për liri e kthyen në dasmë përjetësie”, shprehet Jashari.
Ky është urimi i plotë i tij:
Në ditën që shënon triumfin e dytë të familjes sonë, pas ballafaqimit për ruajtjen e pragut të shtëpisë dhe dhënien e kushtrimit se armiku i ka ditët e numëruara në këtë tokë që, siç thoshte babushi, “veç këmbën e shqiptarit e duron” , familja jonë po rritet dhe po begatohet çdo ditë.
Hamëza, që mban me krenari emrin e babushit, u fejua me Enesa Imeri, në Kosovën e lirë, këtë Kosovë që u ndërtua mbi themele të forta, themele që u hodhën para së gjithash nga të rinjtë dëshmorë të cilët sakrifica për liri i bëri të pavdekshëm.
Gëzime të tilla në familjen tonë na zgjojnë kujtimin e babës Shaban, Kryekomandantit Ademit dhe Babushit, që betejën për liri e kthyen në dasmë përjetësie. Edhe në mes të betejës tre-ditore, kënga nuk pushoi kurrë.
Hamëz dhe Enesa, urime fejesa
Ju urojmë jetë të gjatë, të mbushur me dashuri, lumturi dhe harmoni!
