Në Mitrovicë është mbajtur akademi përkujtimore në 27-vjetorin e vrasjes nga forcat pushtuese serbe të veprimtarëve Latif Berisha e Agim Hajrizi, ku në këtë aktivitet, përveç kryetarit të Mitrovicës, Faton Peci, morën pjesë edhe presidentja Vjosa Osmani dhe ministrja Donika Gërvalla, që të tre bashkëthemelues të partisë GUXO, raporton Veriu.info.
Ndasia politike mes tyre e nisur javë më parë për shkak të zgjedhjes së presidentit të ri është parë sot edhe në Mitrovicë, ku Faton Peci është treguar më i afërt me Donika Gërvallën, e cila njihet si krah i Albin Kurtit, sesa me Vjosa Osmanin.
Në prag të nisjes së akademisë përkujtimore, Faton Peci është parë rrugëve të qytetit me Donika Gërvallën, duke shkuar bashkërisht në qendrën e kulturës për këtë ngjarje.
Pasi e ka përcjellë deri në sallë Donika Gërvallën, Faton Peci është kthyer në hyrje të qendrës duke e pritur Vjosa Osmanin, pritje që është dukur qartazi e ‘ftohtë’, pasi nuk pati as buzëqeshje mes tyre e as përqafime, sikurse jemi mësuar të shohim në të kaluarën.
Me të hyrë në sallë, Vjosa Osmani ka përshëndetur dorë më dorë të gjithë të pranishmit në rreshtin e parë, duke nisur nga Donika Gërvalla, të cilës ia ka zgjatur dorën vetëm zyrtarisht.
Se presidentja Osmani nuk është në linjë me Gërvallën e Pecin është vërejtur edhe në momentin e intonimit të himnit, ku ajo dhe këshilltaret e saj e kanë intonuar me dorë në zemër, përderisa Peci e Gërvalla duke i mbajtur duart poshtë.
Megjithatë, në momente të caktuara Vjosa Osmani është parë duke komunikuar me Faton Pecin, por në asnjë moment me Donika Gërvallën.
Ndryshe, Donika Gërvalla javëve të fundit e ka bërë të qartë se qëndron në linjë me Albin Kurtin, përderisa Faton Peci ka zgjedhur heshtjen në publik, duke mos u deklaruar as për e as kundër Vjosa Osmanit./Veriu.info
