Kërkimi i Barcelonës për një pasardhës afatgjatë të Robert Lewandowskit është bërë një nga temat kryesore përpara merkatos së verës.
Interesimi për Julian Alvarezin është i njohur, dhe brenda klubit ai shihet si profili ideal për të udhëhequr sulmin.
Por realiteti financiar mbetet një pengesë e madhe. Sulmuesi është një lojtar kyç tek Atletico Madridi dhe pjesë e rëndësishme e projektit të Diego Simeones, ndërsa një transferim do të kërkonte mbi 100 milionë euro.
Për këtë arsye, Barcelona po mendon alternativa më të përballueshme, shkruan “Barça Universal”, sipas “OneFootball”.
Fisnik Asllani
Sulmuesi kosovar, 23-vjeçar, që luan te Hoffenheimi ka bërë një sezon solid me 9 gola dhe 8 asistime në 28 ndeshje.
Edhe pse këto shifra nuk duken “tipike për Barcelonën”, profili i tij sugjeron potencial për zhvillim të madh në një sistem më dominues. Nën drejtimin e Hansi Flick, ai mund të rritet ndjeshëm. Me një vlerë rreth 30 milionë euro, është një rrezik i kalkuluar.
Etta Eyong
Aktualisht te Levante, 22-vjeçari ka kontribuar me 6 gola dhe 4 asistime në 27 ndeshje.
Ai nuk është ende produkt i përfunduar, por ka potencial të madh zhvillimi – diçka që Barcelona e vlerëson shumë.
Me një vlerë rreth 18 milionë euro dhe klauzolë rreth 30 milionë, është një opsion i përballueshëm. Për më tepër, të luajturit pranë Lewandowskit mund të përshpejtojë zhvillimin e tij.
Omar Marmoush
Sulmuesi i Manchester Cityt ofron balancën më të mirë mes cilësisë dhe çmimit.
Ai aktualisht është në hije të Erling Haalandit, një situatë e ngjashme me atë që kishte Alvarez më parë.
Marmoush është i gjithanshëm dhe mund të luajë në disa role në sulm, duke i dhënë fleksibilitet taktik ekipit të Flickut.
Me një çmim të mundshëm rreth 50 milionë euro, ai është shumë më i arritshëm se Alvarezi, por me cilësi të provuar.
Në përfundim, Barcelona duhet të balancojë ambicien me realitetin financiar, dhe këto tre opsione përfaqësojnë alternativa më të zgjuara dhe të realizueshme për të ardhmen e sulmit./GazetaExpress/
