Në Kosovë duket se mbrojtja e konsumatorit po mbetet vetëm detyrim në letër, pasi që marketet e mëdha po shkelin ligjin duke fshehur origjinën e produkteve. Ky manipulim i hapur tregon se si interesat e bizneseve po peshojnë më rëndë se e drejta e qytetarit.
Veriu.info ka siguruar një vendim të Inspektoratit Qendror të Mbikëqyrjes së Tregut, me të cilin është gjobit me 1 mijë euro kompania “Super Viva” Sh.P.K. me pronar Mustafë Rexhepi.
Në arsyetimin e vendimit të IQMT të Ministrisë së Industrisë, Ndërmarrësisë, Tregtisë dhe Inovacionit, bëhet se ditur se në Njësinë numër 4 të “Super Viva” në Prizren është kryer inspektim më 26 shkurt 2026, ku kishte urdhëruar këtë kompani të bëjë vendosjen e flamujve të origjinës së produkteve.
Por duket se ky inspektim i realizuar në shkurt ishte i kot, pasi që me rastin e riinspektimit, “Super Viva” e Mustafë Rexhepit ishte sjellur sikur të mos i interesonin ligjet e Kosovës, duke mos zbatuar urdhërat e inspetoratit të tregut, pasi që nuk kishte vendosur prapë flamujt e origjinës së mallrave.
Por, edhe përkundër shkeljes së parë dhe ‘kokëfortësisë’ për të mos zbatuar urdhëresat, IQMT kishte vendosur ta gjobit këtë kompani me vetëm 1 mijë euro, të cilat nëse i paguan brenda 15 ditësh atëherë lirohet nga 50% e gjobës.
Kjo gjobë kaq e vogël mund të duket edhe si inkurajim për të mos zbatuar rregullativën ligjore, e cila edhe mund të fus konsumatorët në lajthitje në lidhje me origjinën e mallrave!
Ndryshe, qëllimi kryesor i vendosjes së flamujve të origjinës pranë produkteve në marketet e Kosovës është informimi dhe mbrojtja e konsumatorit, duke i mundësuar qytetarëve të identifikojnë lehtësisht vendin e prodhimit përpara se të marrin një vendim blerjeje.
Vendosja e flamujve të origjinës së produktit është masë parandaluese e manipulimit eventual të konsumatorëve, sepse në të kundërten paraqiten mundësia që ambalazhi apo gjuha e përdorur në etiketë të mund të krijojë përshtypje të rreme për vendin e origjinës.
Veriu.info ka tentuar të marrë një qëndrim nga “Super Viva” Sh.P.K. për këtë vendim të AIP, por deri në momentin e publikimit të artikullit nuk ka pranuar përgjigje për pyetjet e dërguara.
