Gazetari Visar Duriqi, autor i librit “Mësuesi që u bë vrasës”, ka rrëfyer pjesë nga përvojat e tij me spiunin Nazim Bllaca, i cili është kryepersonazh i librit.
Duriqi në podcast të Veriu.info “Perballje me Gazin me autor Gazmend Morinaz ka teguar se si Bllaca doli në skenë dhe se si paraprakisht ishte planifikuar të realizohej një intervistë ekskluzive me të.
“Unë e kam ditë më herët që është duke dalë ai. Se si u kthy në Kosovë, ai më ka kontaktuar mua. Para se me dalë… Ka qenë në Serbi, prej vitit 2007 e tutje. Nga vera e 2007-ës shkon në Serbi, pasi që nuk pajtohet për një borxh të madh me grupin e Azem Sylës e këtyre që kanë shitur toka bashkë. Diku i mbetet borxh atij grupi nja 80 mijë euro, edhe fillojnë konfliktet, Nazimi pretendon që e kanë sulmu dhe e kanë rrehë, prej inatit ikë në Serbi dhe atje gjen prehje. Tani në Serbi fillon me folë, me i dhanë ato intervistat që i kam shpjegu, i ka një intervistë më 2007-ën, më 2008-ën për toka, e të tjera”, ka deklaruar Duriqi.
“Kur kthehet më 2009-ën, e vëmë kontaktin, shkoj e vizitoj, madje një ditë para se me dalë Bllaca në publik, unë kam pasë me shku me bë intervistë me të. Ditën që kam pasur me shku me bë intervistë më ka thënë “mos hajde, se më ka ndodhur diçka” edhe s’më ka tregu. Ja kish pas sulmu dikush shtëpinë me zollë. Ky nuk ka mujt me prit më që un si gazetar me bë një intervistë dhe me publiku, por ju ka dasht shpejt e shpejt me dalë në krejt mediat”, ka thënë më tej ai.
Përmes këtij libri, Duriqi sjell një pasqyrë të detajuar të deklaratave që dikur tronditën opinionin publik, si dhe proceseve gjyqësore që pasuan dëshmitë e Bllacës, duke rihapur diskutimin mbi rolin e tij në ngjarjet e asaj kohe.
Libri trajton transformimin e Bllacës nga një mësues në një figurë të përfshirë në rrjete të dyshuara të spiunazhit dhe vrasjeve politike, duke ngritur njëkohësisht dilema mbi motivet dhe besueshmërinë e rrëfimeve të tij: a ishte ai një dëshmitar i penduar apo një aktor që ndikoi rrjedhën e drejtësisë?
Në fokus janë edhe dëshmi dhe detaje nga dosje që, sipas autorit, hedhin dritë mbi ngjarje të pazbardhura dhe rikthejnë në vëmendje plagë të vjetra të shoqërisë kosovare.
Librin mund ta gjeni tek Libraria Artini-Toena në Prishtinë
