Prokuroria Themelore në Mitrovicë ka kërkuar caktimin e masës së paraburgimit për 19 persona, të dyshuar për organizim të bixhozit të paligjshëm dhe lojërave të fatit online, në kuadër të një rrjeti të strukturuar që dyshohet se ka operuar në disa lokacione dhe komuna të vendit.
Sipas kërkesës së Prokurorisë, aktiviteti i dyshuar është zhvilluar në një sërë lokalesh, të cilat janë identifikuar si pika ku janë zhvilluar bastet online dhe veprimtaritë e kundërligjshme të lojërave të fatit.
Lokalet ku dyshohet se është ushtruar ky aktivitet janë: “Offside Sport Bar”, “Te Feti”, “Coffe Bar Fisi”, “Elita Bar”, “N’Peron Pub”, “Caffe Time/Game One”, “New York City”, “Te Zogu” dhe “Market Berisha”.
Sipas dosjes së siguruar nga Gazeta Insajderi, në këto ambiente dyshohet se përmes pajisjeve elektronike si kompjuterë, telefona dhe tabletë, është mundësuar qasja në platforma të basteve online, në kundërshtim me ligjin në fuqi.
Gjatë aksionit policor të zhvilluar më 18 prill, janë kryer kontrolle në disa prej këtyre lokaleve, ku janë sekuestruar pajisje elektronike, para të gatshme në vlera të mëdha, si dhe prova të tjera materiale që lidhen me aktivitetin e dyshuar.
Prokuroria thekson se bëhet fjalë për një veprimtari të organizuar dhe të vazhdueshme, e cila dyshohet se është zhvilluar përmes një rrjeti me role të ndara dhe qarkullim të konsiderueshëm të mjeteve financiare.
