Qeveritë nga Kosova dhe Belgjika nga sot kanë marrëveshje dypalëshe për Ndihmë të Ndërsjellë Juridike në Çështjet Penale.
Nënshkrimet në këtë marrëveshje i kanë vënë ministrja kosovare e Drejtësisë, Donika Gërvalla e homologia e saj nga Belgjika, Annelies Verlinden.
Gërvalla ka thënë se kjo marrëveshje pritet ndër të tjera të rrisë ndjeshëm efikasitetin në luftimin e krimit transnacional, dhe njëkohësisht, thotë se krijon bazën ligjore për themelimin e grupeve të përbashkëta hetimore dhe përfshin dispozita të avancuara për ngrirjen, sekuestrimin dhe konfiskimin e pasurisë, shkëmbimin e provave dhe informatave, si dhe marrjen e dëshmive përmes videokonferencës, në përputhje me praktikat më moderne ndërkombëtare.
“Përmes saj, përcaktohen qartë format dhe mekanizmat e ndihmës juridike në çështjet penale, duke përfshirë kushtet për ofrimin e ndihmës, bazat për refuzim, legjislacionin e zbatueshëm dhe procedurat që ndiqen në kërkimin dhe realizimin e kësaj ndihme”, ka bërë të ditur Gërvalla që njoftoi për marrëveshjen.
Ajo ka falënderuar ministren Verlinden për angazhimin drejt thellimit të mëtejmë të bashkëpunimit mes të dyja shteteve.
