Prokuroria Themelore në Mitrovicë njofton opinionin publik se janë arrestuar dy mjekë të dyshuar të spitalit në Vushtrri nën dyshimin se kanë kryer veprën penale “Marrja e ryshfetit”.
Gazeta Online Veriu.info raportoi ekskluzivisht se dy mjekët e arrestuar janë Ekrem Sefiu dhe Valdet Rexhepi.
Sipas dyshimeve fillestare, i dyshuari Ekrem Sefiu në tri raste, ndërsa i dyshuari Valdet Rexhepi në pesë raste, kanë kërkuar dhe pranuar para nga qytetarët për ofrimin e shërbimeve shëndetësore.
Por kjo del të mos jetë hera e parë që kirurgu Valdet Rexhepi akuzohet për marrje të ryshfetit.
I njëjti, i akuzuar për “marrje të ryshfetit” ishte shpallur fajtor nga Gjykata Themelore e Mitrovicës në vitin 2017.
Për dy pikat e aktakuzës me të cilat ngarkohej, Rexhepi ishte dënuar me dënim unik prej 6 muaj burgim efektiv.
Por, me pranimin e të pandehurit, ky dënim ishte konvertuar në gjobë, në shumë prej 2,400 euro.
Gjykata kishte vendosur që shuma prej 250 euro të cilat i janë konfiskuar të pandehurit t’u kthehen palëve të dëmtuara.
Një dënim i tillë vjen pasi i pandehuri gjatë seancës kishte pranuar fajësinë për veprat penale për të cilat ngarkohej.
Por, në këtë rast nuk ishte aplikuar neni 65 i Kodit Penal të Republikës së Kosovës, i cili përcakton se Gjykata mund t’ia ndalojë kryesit ushtrimin e funksioneve në administratën publike ose në shërbimin publik prej një (1) deri në tre (3) vjet, nëse personi i tillë i ka keqpërdorur këto funksione dhe është dënuar me gjobë ose me dënim me kusht.
Për shkak të kësaj, i pandehuri edhe pse ishte shpallur fajtor, kishte profesionin e tij prej kirurgu në Spitalin “Sheik Zayed”.
Sipas aktit akuzues, Rexhepi, si kirurg i përgjithshëm në Spitalin “Sheik Zayed”, e i angazhuar me punë në Spitalin Rajon “Dr. Sami Haxhibeqiri”, në mënyrë të drejtpërdrejtë ka kërkuar dhe pranuar përfitim material në mënyrë që të veprojë në pajtim me detyrën e tij.
Në njërin rast, i pandehuri kishte marrë 150 euro nga i dëmtuari Bahtir Jonuzi, në mënyrë që ta operojë gruan e këtij të fundit. Në rastin e dytë, i pandehuri kishte marrë 100 euro nga i dëmtuari Ajet Dajaku, për një fotografim që i ishte bërë gruas së tij, Valdete Gashit.
Ekskluzive: Këta janë dy mjekët e arrestuar në Spitalin e Vushtrrisë për marrje ryshfeti (Emrat)
