Gjykata Themelore në Mitrovicë – dega në Vushtrri ka marrë një vendim skandaloz, duke mos aprovuar kërkesën e Prokurorisë për caktimin e masës së paraburgimit ndaj Avdullah Gerbeshit, i cili ka kanosur në seancë gjyqësore prokurorin Muharrem Prekazi.
“Gjykata Themelore në Mitrovicë – Dega në Vushtrri, Departamenti i Përgjithshëm – Divizioni Penal, gjyqtari i procedurës paraprake Agron Maxhuni e ka refuzuar kërkesën e Prokurorisë Themelore në Mitrovicë – Departamenti I Përgjithshëm, për caktimin e masës së paraburgimit ndaj të pandehurit A.G., dhe ndaj tij është caktuar masa e arrestit shtëpiak, në kohëzgjatje prej një (1) muaji”, thuhet në njoftimin e gjykatës.
Kanosi brenda gjykatës prokurorin Muharrem Prekazi, ndalohet për 48 orë Avdullah Gërbeshi
Tutje, thuhet se masa e arrestit shtëpiak sipas aktvendimit, të pandehurit i llogaritet nga data 13.05.2026, e do të zgjasë deri me datën 12.06.2026.
“Për të pandehurin A.G. ekziston dyshimi i bazuar se ka kryer veprën penale Kanosja nga neni 181 par. 3 lidhur me par. 1 të KPRK-së. Për mbikëqyrjen e masës së arrestit shtëpiak është i obliguar Stacioni Policor në Vushtrri, ashtu që të pandehurit i ndalohet largimi nga shtëpia e tij, pa lejen e gjykatës. Nëse i pandehuri shkel masën e arrestit shtëpiak, e njëjta do të zëvendësohet me masën e paraburgimit”, përfundon komunikata e gjykatës.
Ndryshe, para dy ditësh në seancë gjyqësore Avdullah Gerbeshi ka kanosur prokurorin Muharrem Prekazi, i cili në shtator të vitit të kaluar kishte kryer një aksion të bastisjeve në pronat e familjes Gerbeshi, e cila ndër vite është akuzuar për fajde, ku në mesin e të arrestuarve ishte edhe Avdullah Gerbeshi, nën dyshimin se ka kryer veprën penale detyrimi.
