Kuvendi i Kosovës një muaj më parë kishte dështuar të zgjedhë presidentin e ri të vendit brenda afatit kushtetues, duke çuar automatikisht në shpërndarjen e Kuvendit dhe caktimin e zgjedhjeve të reja parlamentare më 7 qershor.
Në seancën e fundit, deputetët e shumicës parlamentare u mblodhën për të tentuar zgjedhjen e presidentit, por mungesa e kuorumit e bëri të pamundur zhvillimin e votimit.
Sipas përfaqësuesve të partisë në pushtet, opozita nuk mori pjesë në seancë dhe nuk qëndroi në sallë për të siguruar kuorumin e nevojshëm.
Kryetarja e Kuvendit, Albulena Haxhiu, deklaroi se me përfundimin e afatit kushtetues, legjislatura konsiderohet e mbyllur dhe Kuvendi i shpërndarë. Ajo tha se të gjitha veprimet janë ndërmarrë në përputhje me Kushtetutën.
Ndërkaq, kryeministri Albin Kurti akuzoi opozitën për bllokim institucional, duke thënë se mungesa e deputetëve në seancë ka sjellë vendin në zgjedhje të reja. Sipas tij, partia në pushtet ka ofruar mundësi bashkëpunimi me partitë opozitare, por pa rezultat.
Si janë zgjedhur presidentët e Kosovës ndër vite?
Fatmir Sejdiu (2008)
Sejdiu është zgjedhur pas tre raundeve votimi. Numri i votave është rritur gradualisht: 62 në raundin e parë, 61 në të dytin dhe 68 në të tretin, duke treguar një proces me negociata politike deri në sigurimin e shumicës.
Behgjet Pacolli (2011)
Edhe zgjedhja e Pacollit ka kaluar në disa raunde: 54, pastaj 58 dhe në fund 62 vota. Kjo tregon një proces të vështirë dhe jo konsensual, ku vetëm në raundin e fundit u arrit numri i nevojshëm.
Atifete Jahjaga (2011)
Jahjaga është zgjedhur në një mënyrë më të veçantë dhe më konsensuale, duke marrë 80 vota në një raund të vetëm. Kjo tregon një marrëveshje politike më të gjerë në Kuvend.
Hashim Thaçi (2016)
Thaçi është zgjedhur pas disa raundeve: 50 në raundin e parë, 64 në të dytin dhe 71 në të tretin. Edhe këtu shihet rritje e mbështetjes gjatë procesit të votimit.
Vjosa Osmani (2021)
Osmani ka marrë 69 vota në raundin e parë, 67 në të dytin dhe 71 në të tretin, duke përfunduar me zgjedhje të suksesshme pas një procesi të ngjashëm me atë të Thaçit.
Statistikat tregojnë se shumica e presidentëve janë zgjedhur vetëm pas raundit të tretë të votimit, ndërsa vetëm Atifete Jahjaga arriti të zgjidhej që në raundin e parë me 80 vota.
Me dështimin e zgjedhjes së presidentit këtë herë dhe mungesën e kuorumit në Kuvend, Kosova hyn në një proces të ri zgjedhor, ku qytetarët i-u drejtuan kutive të votimitsot më 7 qershor për të zgjedhur përbërjen e re të Kuvendit./Indeksonline
