Zyra Kombëtare e Auditorit ka gjetur parregullsi e shkelje edhe në projektin e ndërtimit të urave të reja në Mitrovicë, të cilat buxhetit të Kosovës ia harxhuan mbi 3 milionë euro. ZKA ka gjetur se menaxheri i projektit i angazhuar në terren, s’ishte i njëjtë me menaxherin e deklaruar në ofertën e operatorit ekonomik fitues, duke devijuar nga kapacitetet profesionale të vlerësuara gjatë tenderimit.
Gjithashtu, ZKA ka gjetur se “nga rishikimi i dokumentacionit, është vërejtur se punimet lidhur me armaturën dhe betonin janë realizuar nga një palë e tretë (nënkontraktues). Megjithatë, për këtë angazhim nuk është ndjekur procedura e përcaktuar në kontratë, pasi nuk ka pasur njoftim zyrtar me shkrim dhe as miratim paraprak nga Autoriteti Kontraktues”.
Gjatë verifikimit po ashtu në terren është vërejtur se në dy pozicione të kontratës është vendosur mbishkrimi i kompanisë që ka kryer punimet (nënkontraktuesit).
“Ky element nuk ka qenë i paraparë në projektin dhe specifikimet teknike, prandaj paraqet devijim nga projekti i miratuar”, thotë Audoitori.
Një tjetër element i rëndësishëm është fakti se Ministria e Infrastrukturës kishte lidhur aneks-kontratë me kompaninë, për punë që kjo e fundit tashmë veç i kishte kryer.
Sipas shpjegimit të dhënë nga palët, këto punë të kryera nga kompania nuk kishin qenë pjesë e kontratës bazë.
“Për këtë projekt është nënshkruar aneks-kontratë më 29.12.2025. Sipas kushteve të kontratës, punimet duhet të fillonin me datën e nënshkrimit, mirëpo për shkak të kushteve atmosferike të pafavorshme ishte paraparë që fillimi i punimeve të bëhej pas lëshimit të letrës për fillimin e punimeve nga menaxheri i projektit, e cila është lëshuar më 13.03.2026. Megjithatë, gjatë vizitës në terren është konstatuar se punët e dheut (Pozicioni 2), punët për largimin e ujërave atmosferik (pozicioni 6) dhe punët e asfaltit (pozicioni 7) përfshira në aneks-kontratë kishin përfunduar. Nga sqarimet dhe dëshmitë e siguruara rezulton se këto punë ishin realizuar së bashku me punët e kontratës bazë, përkatësisht para nënshkrimit të aneks-kontratës. Kjo ka ndodhur pasi që këto punime nuk kanë qenë të përfshira në projektin bazë, dhe mungesa e tyre do të rezultonte që ura të mbetej e pashfrytëzueshme”, thotë Auditori.
Më 1 korrik 2025, Ministria e Infrastrukturës shpërbleu me kontratë kompaninë “Eurokos Holding”, përmes procedurës së negociuar pa publikim të njoftimit të kontratës. Gjithësej ishin pranuar pesë aplikime, por vetëm ai nga “Eurokos Holding SH.P.K”, u konsiderua i përgjegjshëm duke u shpallur kështu fitues.
VOX Kosova, kishte publikuar një fotografi të pronarit të kësaj kompanie, Ylber Shamolli, me kryeministrin në detyrë, Albin Kurti dhe ministrin e Kulturës, Hajrulla Çeko.
Megjithatë, Shamolli kishte mohuar lidhjet me pushtetin.
“Unë jam kanë ma shumë se 10 vjet nënkryetar dhe anëtar i bordit të Federatës së Tenisit. U kanë inaugurimi i fushave të tenisit në Taukbahçe që i ka financu ministria edhe Komuna e Prishtinës. Qata është edhe nënkryetari i komunës e kryetari i Federatës. Janë krejt edhe unë si nënkryetar kam marrë pjesë në inaugurim të fushave. Ajo ka qenë fotografi e rastësishme bile më kanë thirrë ti po e sheh qysh kam dalë unë veç krytë aty se më kanë thirrë hajde, hajde, hajde”, thoshte Shamolli, VOX Kosovës.
