Po vazhdojnë punimet për ndërtimin e urës së tretë mbi lumin Ibër, projekt që, sipas Qeverisë, synon të përmirësojë infrastrukturën, të lehtësojë qarkullimin dhe të forcojë lidhjen ndërmjet qytetarëve në të dy anët e lumit.
Ministri në detyrë i Infrastrukturës, Dimal Basha, ka bërë të ditur se punimet në këtë projekt po avancojnë sipas planit, duke e cilësuar urën si një investim me rëndësi për zhvillimin ekonomik dhe integrimin e vendit.
“Ura e tretë mbi lumin Ibër po realizohet, duke forcuar lidhjen ndërmjet qytetarëve dhe mundësinë e zhvillimit të ekonomisë në të dy anët e lumit. Punët tona po e lidhin edhe më shumë veriun me jugun”, ka deklaruar Basha.
Ai ka thënë se projektet infrastrukturore po ndryshojnë edhe debatin për veriun e vendit.
“Sot debati nuk është më nëse Kosova po ndahet, por sa shumë po afrohen pjesët e saj përmes investimeve infrastrukturore”, është shprehur ministri në detyrë.
Basha ka theksuar se ekzekutivi do të vazhdojë me investime të ngjashme, të cilat, sipas tij, synojnë zhvillimin ekonomik, përmirësimin e infrastrukturës dhe integrimin e plotë të territorit të Kosovës.
