Ish-deputeti i PDK-së, Ferat Shala, ka vlerësuar se moszhvillimi i projektit të gazit natyror dhe moslidhja e Kosovës me rrjetin rajonal të gazit mund t’i kushtojnë vendit qindra miliona euro, duke e mbajtur ekonominë të varur nga linjiti dhe importet e shtrenjta të energjisë elektrike.Duke iu referuar një studimi të financuar nga institucionet amerikane dhe Millennium Challenge Corporation (MCC), Shala për GazetaBlic tha se investimi në infrastrukturën e gazit mund t’i sjellë Kosovës përfitime neto deri në 600 milionë euro.
“Moszhvillimi i projektit të gazit natyror dhe moslidhja e Kosovës me rrjetin rajonal të gazit mund t’i kushtojnë vendit qindra miliona euro, duke e mbajtur ekonominë të varur nga linjiti dhe nga importet e kushtueshme të energjisë elektrike. Sipas studimit të financuar nga institucionet amerikane dhe Millennium Challenge Corporation (MCC), investimi në infrastrukturën e gazit natyror mund t’i sjellë Kosovës përfitime neto deri në 600 milionë euro, me një normë kthimi ekonomike prej rreth 27%”, thotë Shala.“Përfitimet kryesore të këtij investimi do të ishin:
Diversifikimi i burimeve të energjisë dhe zvogëlimi i varësisë nga linjiti;
Ulja e nevojës për importe të shtrenjta të energjisë elektrike;
Përmirësimi i cilësisë së ajrit dhe mbrojtja e shëndetit publik;
Rritja e sigurisë energjetike dhe integrimi i Kosovës në tregun rajonal të gazit;
Thellimi i partneritetit strategjik me Shtetet e Bashkuara të Amerikës dhe harmonizimi me politikat energjetike të Bashkimit Evropian”, shton tutje ai.Ai theksoi se gazi natyror duhet të shërbejë si zgjidhje tranzitore, krahas investimeve në energjinë e ripërtëritshme, ndërsa ngriti pyetjen nëse Kosova mund ta përballojë koston ekonomike dhe strategjike të mosveprimit.
“Megjithatë, gazi natyror nuk duhet të shihet si zgjidhja përfundimtare e sektorit energjetik. Ai përfaqëson një zgjidhje tranzitore dhe strategjike, e cila duhet të zhvillohet paralelisht me investimet në burimet e ripërtëritshme të energjisë, efiçiencën energjetike dhe modernizimin e sistemit elektroenergjetik”, tha Shala.“Në fund, pyetja thelbësore mbetet: A mund ta përballojë Kosova koston ekonomike, strategjike dhe zhvillimore të mosveprimit?”, përfundon ai për GazetaBlic.
